काठमाडौं– रुसको आक्रमणमा परेको युक्रेनबाट ३०३ जना नेपाली सुरक्षित गन्तव्यमा पुगेका छन् । जर्मनीस्थित नेपाली दूतावासका अनुसार द्वन्द्व सुरू भएपछि मंगलबारसम्मको अवधिमा उक्त संख्याका नेपालीहरूले युक्रेन छाडेका हुन् ।
द्वन्द्वग्रस्त क्षेत्रमा रहेका नेपालीहरूलाई स्वदेश फर्कन सरकारले आग्रह गरेको थियो । जर्मनीमा रहेको नेपाली दूतावासमा सम्पर्क गर्न आग्रह गरिएको थियो । युक्रेनमा रहेका नेपालीको उद्धारका लागि दूतावास र एनआरएनएको संयुक्त टोली उद्धारका लागि खटिएको बताइएको छ ।
रुसले युक्रेनको राजधानी किभसहित पूर्वीक्षेत्रमा आक्रमण बढाएपछि त्यस क्षेत्रमा रहेका नेपाली सुरक्षित ठाउँको खोजीमा रहेको बताइएको छ । मंगलबार बेलुकासम्म ३०३ जना नेपालीले युक्रेन छोडेको पुष्टि भएको परराष्ट्र मन्त्रालयले जानकारी दिएको छ । युक्रेन छोड्नेको संख्या यो भन्दा केही बढी हुनसक्ने सम्भावना रहे पनि अहिलेसम्म औपचारिक रूपमा मन्त्रालयमा ३०३ जनाको जानकारी प्राप्त भएको जनाएको छ ।
युक्रेनमा रहेका नेपालीमध्ये सबैभन्दा धेरै पोल्याण्ड गएको जनाइएको छ । अहिलेसम्म २३२ नेपाली पोल्याण्ड पुगिसकेको जानकारी दिइएको छ । त्यस्तै ३९ जना स्लोभाकिया, नौ जना हंगेरी र २३ जना रोमानिया पुगिसकेको मन्त्रालयले जनाएको छ । युक्रेनमा रहेका केही नेपाली अझै बाहिरिने पर्खाइमा रहेकोसमेत जनाइएको छ । उनीहरूलाई पनि नेपाल सरकारले जर्मनीमा रहेको नेपाली दूतावासको सम्पर्कमा आउनका लागि अनुरोध गरेको जनाइएको छ ।
यसैबीच युक्रेनबाट स्लोभाकियाको राजधानी ब्रातिस्लाभा पुगेका नेपालीहरूलाई त्यहाँ रहेको ‘नेपाल रेस्टुरेण्ट’मा राखिएको बताइएको छ । उक्त रेस्टुरेण्टलाई अहिले उद्धार केन्द्र बनाइएको जानकारी दिइएको छ । स्लोभाकियामा विगत १० वर्षदेखि रेस्टुरेण्ट सञ्चालन गर्दै आएका ताप्लेजुङका जयप्रसाद सिवाकोटीले १५ दिनका लागि रेस्टुरेण्ट बन्द गरेर उद्धार केन्द्रको रूपमा प्रयोग गर्न दिएको गैरआवासीय नेपाली संघ (एनआरएनए) ले जानकारी दिएको छ ।
-1752335779.jpg)
