काठमाडौं– रोजगार अनुमति प्रणाली (इपिएस)मार्फत् दक्षिण कोरिया जानका लागि छनोट भएका युवाका लागि पुनः प्रवेश खुला हुने भएको छ । कोरोना संक्रमणको जोखिमका कारण माघको दोस्रो सातादेखि रोकिएको प्रवेश २३ फागुनदेखि पुनः खुला गरिने भएको हो ।
वैदेशिक रोजगार विभागका अनुसार २३ फागुुनका दिन इपिएसमार्फत् दक्षिण कोरियामा रोजगारीका लागि छनोट भएर पनि जान नपाएकामध्येबाट २३६ जना एकैपटक कोरिया प्रस्थान गर्ने भएका छन् । त्यस दिन यसअघि रोकिएकासहित ९८ नियमित र १३८ प्रतिबद्ध श्रमिक कोरिया जाने विभागले जनाएको छ । कोरोनाका कारण रोकिएको कोरिया रोजगारीमा कोरियाले इपिएसमार्फत् कोरिया गइ चार वर्ष १० महिना काम गरेर समयभित्रै फर्केका नेपालीहरूलाई पहिलो प्राथमिकतामा राखेर श्रमिक लगिरहेको छ ।
विभागका अनुसार अब उडान खुला भएसँगै नियमित र प्रतिबद्ध दुवै तरिकाबाट कोरिया जान छनोट भएका युवा कोरिया प्रवेश गर्न पाउने बताइएको छ । कात्तिकदेखि सुरू भएको दक्षिण कोरिया उडानमा अधिकांश प्रतिबद्ध श्रमिकहरू मात्रै कोरिया गइरहेको अवस्थामा अब दुवै समूहका श्रमिक जान पाउने जनाइएको छ । विभागअन्तर्गतको इपिएस कोरिया शाखाका अनुसार नियमिततर्फका करिब सात हजार र प्रतिबद्ध श्रमिकतर्फ तीन हजार गरी १० हजार श्रमिक कोरिया जान छनोट भएका छन् । यीमध्ये एक हजार ७१ श्रमिक कोरिया गइसकेको र बाँकी अझै जाने प्रतिक्षामा रहेको बताइएको छ ।
दक्षिण कोरिया जानका लागि सबै प्रक्रिया पूरा गरेका बाँकी युवालाई सक्दो छिटो दक्षिण कोरिया लैजाने विषयमा कोरियाको मानव संसाधन विभाग (एचआरडी) का अधिकारीहरूसँग कुराकानी भइरहेको बताइएको छ । यस विषयमा उनीहरू पनि सकारात्मक देखिएको बताइएको छ । नेपाली श्रमिकको कामप्रति कोरियाको सरकार सन्तुष्ट रहेकाले कोरियाका लागि छनोट भएका नेपाली श्रमिक अबको समयमै कोरियाको रोजगारीमा जान पाउने विश्वास गरिएको छ ।
कोरियन पक्षसँगको छलफका क्रममा नेपालमा कोरोनाको जोखिम कम भएकाले नेपालबाट कोभिड–१९ परीक्षण गरेर कोरिया प्रवेश गरेका युवालाई पुनः परीक्षण गरेर सीधै कम्पनीमा पठाउन पनि प्रस्ताव गरिएको जनाइएको छ । यस विषयमा पनि कोरिया सकारात्म रहेको बताइएको छ । कोरिया जाने श्रमिकले कोत्भिड–१९ विरुद्धको खोप कार्ड वा क्यूआर कोड प्रमाणपत्रको प्रतिलिपि र दक्षिण कोरिया पुगेपछि १० दिन आङ्खनै खर्चमा अनिवार्य क्वारेन्टिनमा बस्नुपर्ने नियम राखिएको छ ।
त्यसका लागि अवश्यक पर्ने आर्थिक खर्च श्रमिक आफैंले बेहोर्नुपर्ने जनाइएको छ । क्वारेन्टिनमा प्रतिदिन एक लाख २० हजार कोरियाली वनका दरले आवश्यक पर्ने १२ लाख वन अर्थात् एक लाख १९ हजार रूपैयाँ श्रमिक स्वयंले बेहोर्नुपर्ने जनाइएको छ ।
-1752335779.jpg)
