काठमाडौं– नेपालीहरूको प्रमुख श्रम गन्तव्यमध्येको एक युएईमा सार्वजनिक स्थानमा अनिवार्य मास्क लगाउनुपर्ने नियम हट्ने भएको छ । कोरोना भाइरसको संक्रमण नियन्त्रणका लागि लागू गरिएको यो नियम संक्रमणदर कम हुँदै गएपछि हटाउन लागिएको हो ।
युएई सरकारले १ मार्चदेखि सार्वजनिक स्थलमा अनिवार्य मास्क लगाउनुपर्ने नियम हटाउने त्यहाँको स्थानीय सञ्चारमाध्यमले जनाएका छन् । यो नियम लागू भएसँग अब घरबाहिर वा सार्वजनिक स्थलमा जाँदा मास्क नलगाए पनि हुने भएको समाचारमा जनाइएको छ ।
घरबाहिर र सार्वजनिक स्थानमा मास्क नलगाए हुने भए पनि बन्द स्थान वा धेरै व्यक्ति भेला हुने घरभित्र (इनडोर) भने अनिवार्य रूपमा मास्क लगाउनुपर्ने समाचारमा उल्लेख छ । साथै, ‘कन्ट्याक्ट ट्रेसिङ’मा परेकालाई अनिवार्य क्वारेन्टिनमा बस्नुपर्ने नियमसमेत हटाइने युएईको राष्ट्रिय आपतकालीन संकट व्यवस्थापन समितिलाई उद्धृत गर्दै समाचारमा जनाइएको छ ।
कोरोना पोजिटिभ देखिएका व्यक्तिले आइसोलेसनमा बस्नुपर्ने नियममा भने कुनै परिवर्तन नगरिएको बताइएको छ । यस्तै युएई प्रवेश गर्ने यात्रुले पूर्णमात्रा खोप लगाएको भए खोप लगाएको प्रमाण र खोपको पूर्णमात्रा नलगाएकाहरूले ४८ घन्टाभित्रको पिसीआर ‘नेगेटिभ’ रिपोर्ट देखाउनुपर्ने नियमलाई यथावत् राखिएको समाचारमा उल्लेख छ ।
