काठमाडौं– रुसले युक्रेनमाथि आक्रमण गरेपछि चर्किएको द्वन्द्वमा फसेका नेपालीहरूको उद्धार गर्न उच्चस्तरीय संयन्त्र गठन गरिएको छ । शनिबार गैरआवासीय नेपाली संघ (एनआरएनए)को आयोजनामा भएको अन्तक्र्रियामार्फत् जर्मनीका लागि नेपाल राजदूत रामकाजी खड्काको अध्यक्षतामा संयन्त्र गठन गरिएको जानकारी दिइएको छ ।
एनआरएनएका युरोपस्थित राष्ट्रिय समितिहरू समेत रहेको उक्त संयन्त्रको संयोजकमा एनआरएनएका उपाध्यक्ष डा. बद्री केसी (रुस) रहेका छन् । संयन्त्रको सदस्य सचिवमा डा. चिरञ्जीवी खड्का (चेक रिपब्लिक) तथा सदस्यहरूमा जीवन केसी (पोल्याण्ड), हरिबहादुर मल्ल (युक्रेन), शिवकुमार भुर्तेल (रुस), जयप्रसाद शिवाकोटी (स्लोभाकिया), नवराज पोखरेल (रोमानिया), सुरेन्द्र श्रेष्ठ (हंगेरी), यदुराम पन्थी (चेक रिपब्लिक), मिलन पन्त (जर्मनी) र प्रेस संयोजकमा चिरन शर्मा (यूके) रहेका छन् ।
द्वन्द्वग्रस्त क्षेत्रमा रहेका नेपालीहरूका लागि आवश्यक स्वास्थ्य सेवा उपलब्ध गराउन डा. बोधराज सुवेदीको संयोजकत्वमा एक उपसमिति गठन गरिएको छ । अन्तक्र्रियामा राजदूत खड्काले युक्रेन र रुसको द्वन्द्वबाट प्रभावित दुई सय २० जना नेपाली दूतावासको सम्पर्कमा आएको बताएका छन् । उनले ती नेपालीहरूको सहयोगका लागि दूतावासले नेपाल सरकार, स्थानीय संघसंस्थाहरूसँग समन्वय गरिरहेको बताए । एनआरएनएका अध्यक्ष कुमार पन्तले द्वन्द्वग्रस्त मुलुक युक्रेनमा रहेका नेपालीलाई नआत्तिन आग्रह गरे । कार्यक्रममा एनआरएनएका उपाध्यक्ष डा. केसीले द्वन्द्वग्रस्त युक्रेनबाट नेपालीको उद्धार प्रक्रिया सुरु भइसकेको बताए । उनले सीमा क्षेत्रमा एक दर्जनभन्दा बढी एनआरएनएका स्वयंसेवक परिचालन गरिसकिएको जानकारी दिए ।
संघअन्तर्गतको वैदेशिक रोजगार तथा कल्याणकारी विभागका संयोजकसमेत रहेका डा. केसीलाई एनआरएनएले युक्रेनमा समन्वयको जिम्मेवारी दिइएको छ । कार्यक्रममा एनआरएनए युक्रेनका अध्यक्ष हरि मल्लले युक्रेनमा रहेका नेपालीहरूको अवस्थाबारे जानकारी दिएका थिए । अन्तक्र्रियामा सीमा क्षेत्रमा थप स्वयंसेवक परिचालन गर्ने, नेपाल फर्किन चाहनेहरूका लागि हवाई टिकटको लागि समन्वय गर्ने, सीमा क्षेत्रमा आएका नेपालीलाई खाना बस्नको व्यवस्था गर्ने, कानुनी परामर्शको लागि एनआरएनए राष्ट्रिय समिति परिचालन, उद्धारका लागि स्थानीय रूपमा संयन्त्र गठन गर्ने, स्वयंसेवकहरूका लागि आवश्यक परिचयपत्र प्रदान गर्ने, आर्थिक संकलन गर्ने जस्ता गतिविधि तत्काल अघि बढाउन उच्चस्तरीय समितिलाई आग्रह गरेको छ ।
युक्रेनको द्वन्द्व प्रभावित नेपालीहरूलाई पोल्याण्ड, हंगेरी, रोमानिया, माल्डावा र स्लोभाकियाको सीमामार्फत् उद्धार थालिएको छ । हालसम्म नेपाली दूतावास जर्मनी र एनआरएनएसँग चार सय जना नेपाली सम्पर्कमा आएको जानकारी दिइएको छ ।
-1752335779.jpg)
