काठमाडौं– बेलायतका लागि नवनियुक्त नेपाली राजदूत ज्ञानचन्द्र आचार्यले पदबहाली गरेका छन् । राजदूत आचार्यले बुधबार लण्डनस्थित नेपाली दूतावासमा पदबहाली गरेका हुन् ।
बुधबार लण्डन पुगेका आचार्यले २२औं राजदूतका रूपमा पदबहाली गरेको बताइएको छ । उनले आफ्नो भावी कार्ययोजनाबारे छलफल गर्ने क्रममा नेपाल र संयुक्त अधिराज्यबीचको द्विपक्षीय, राजनीतिक, आर्थिक तथा सांस्कृतिक सम्बन्ध अझ सुदृढ बनाउने बताएका छन् । साथै, गैरआवासीय नेपालीहरूसँगको सहकार्य बढाउने प्रतिबद्धतासमेत राजदूत आचार्यले व्यक्त गरेका छन् ।
उनले भूतपूर्व ब्रिटिस गोर्खाको समस्या समाधान पनि आफ्नो प्राथमिकताको विषय रहेको बताएको बेलायतस्थित नेपाली दूतावासले विज्ञप्तिमार्फत् जानकारी दिएको छ । व्यापार, लगानी तथा पर्यटन प्रवद्र्धनलगायत आर्थिक कूटनीतिका क्षेत्रमा दूतावासको भूमिकालाई अझ प्रभावकारी बनाउन एक जना कर्मचारीलाई सम्पर्क व्यक्तिको रूपमा तोकिने योजना राजदूत आचार्यले अघि सारेकोे विज्ञप्तिमा उल्लेख छ ।
आचार्यको पदबहालीसँगै गत २४ अक्टोबरदेखि राजदूतविहीन रहेको लण्डन दूतावासले नयाँ राजदूत पाएको छ । पछिल्लो चार महिना दूतावासकी उपनियोग प्रमुख रोशन खनालले कार्यवाहक राजदूतको जिम्मेवारी सम्हाल्दै आएकी थिइन् ।
अर्थशास्त्रमा स्नातकोत्तर गरेका आचार्यले सन् १९८३ मार्चमा शाखा अधिकृतको रूपमा नेपालको परराष्ट्र सेवामा प्रवेश गरेका थिए । परराष्ट्र मन्त्रालयका पूर्वसचिवसमेत रहेका उनले संयुक्त राष्ट्रसंघका लागि नेपालको स्थायी प्रतिनिधिका साथै राष्ट्रसंघमा उपमहासचिवको जिम्मेवारीसमेत सम्हालिसकेका छन् ।
