काठमाडौं– नेपालबाट संयुक्त अरब इमिरेट्स (युएई) जाने यात्रुले अब विमानस्थलमा रेपिड पिसिआर परीक्षण गर्न नपर्ने भएको छ । युएईले पछिल्लो समय गरेको निर्णयअनुसार काठमाडौंबाट दुबई जाने यात्रुले त्रिभुवन अन्तर्राष्ट्रिय विमानस्थलमा उडानको समयभन्दा ६ घन्टाभित्र गर्दै आएको रेपिड पिसिआर परीक्षण गर्न नपर्ने भएको हो ।
विश्वव्यापी रूपमा फैलिएको कोरोना भाइरसको महामारीका कारण यस्तो नियम लागू गरिएको थियो । तर, पछिल्लो समय कोरोना भाइरसको संक्रमण घट्दै गएपछि दक्षिण कोरियाबाहेकका नेपालका श्रम गन्तव्य मुलुकहरूमा कोरोना संक्रमण रोकथामसम्बन्धी प्रावधान खुकुलो पारिदै लगिएको छ ।
नेपाल एयरलाइन्सले युएईले नियम परिवर्तन गरेकाले अब यात्रुले यसअघि गर्दै आएको रेपिड पिसिआर परीक्षण गर्न नपर्ने जनाएको छ । एयरलाइन्सले एक विज्ञप्ति जारी गर्दै दुबई जाने यात्रुले यस्तो परीक्षण गर्न नपर्ने प्रस्ट पारेको हो । विज्ञप्तिमा युएईले यो नियम १ फागुनदेखि नै परिवर्तन गरिसकेको उल्लेख गरिएको छ ।
विमानस्थलमा रेपिड पिसिआर परीक्षण गर्न नपरे पनि युएई जानका लागि ४८ घन्टाभित्रको पिसिआर नेगेटिभ रिपोर्ट भने अनिवार्य नै छ । युएई सरकारले कोरोना महामारीको दोस्रो लहरको समयमा संक्रमण रोकथामका लागि यो नियम लागू गरेको थियो ।
-1745656903.jpeg)