काठमाडौं– वैदेशिक रोजगारीमा जाने श्रमिकको कागजात प्रमाणीकरण र उद्धारको काम गर्दै आएको कन्सुलर सेवा विभागले श्रमिक र उनीहरूको परिवारको समस्या सुन्न र समाधानका उपाय सुझाउन निःशुल्क टेलिफोन सेवा सञ्चालन गर्ने भएको छ । त्यस्तै विभागले मोबाइल एप्लिकेसन पनि निर्माण गरिरहेको जानकारी दिएको छ । १ फागुनदेखि त्रिपुरेश्वरस्थित कार्यालयबाट नियमित सेवा सुरू गरेको विभागले चाँडै निःशुल्क टेलिफोन सेवा सञ्चालनमा ल्याउन लागेको हो ।
विभागका महानिर्देशक धनबहादुर वलीका अनुसार विभागले केही दिनभित्रै ११५२ नम्बरको निःशुल्क टेलिफोन सेवा सञ्चालन गर्ने छ । यो नम्बरमा देशभरिबाट निःशुल्क फोन गर्न सकिन्छ । समस्यामा परेका व्यक्ति र उनीहरूका परिवारले यो नम्बरमा फोन गरेर आफ्नो समस्या राख्न सक्छन् । फोनमार्फत नै गर्नुपर्ने प्रक्रिया आवश्यक कागजात र विभागले गर्ने सहयोगबारे जानकारी गराउने छ । श्रमिक र उनीहरूका परिवारले कन्सुलर सेवा विभागको वेबसाइटमार्फत आफूलाई परेको समस्या समाधानका लागि निवेदन दिन सकिने व्यवस्था रहेकोमा निःशुल्क टेलिफोन सेवा थप गर्न लागेको हो ।
यस्तै, विभागले छिट्टै कन्सुलर एप पनि ल्याउने भएको छ । यो एपबाट पनि वैदेशिक रोजगारीमा रहेका श्रमिक र उनीहरूका परिवारले आफूलाई परेको समस्या राख्न, समस्या समाधानका लागि भइरहेको पहललगायतका जानकारी एपबाटै लिनसक्ने विभागका महानिर्देशक वलीले जानकारी दिएका छन् ।
आफ्नो देशका नागरिक अर्को देशमा जाँदा उनीहरूले पाउने सुविधा, कानुनी उपचार, उनीहरूको अवस्था र आइपर्ने समस्याहरूका समग्र विषयलाई एक देशले अर्को देशमा कस्तो सेवा दिने, कुन प्रकारले व्यवहार गर्ने, कुन हैसियतमा राख्ने भन्ने कुराहरू कन्सुलर सेवाअन्तर्गत पर्छन् ।
-1745656903.jpeg)