काठमाडौं – वैदेशिक रोजगारमा ठगी नियन्त्रण गर्न विभागले प्रहरी परिचालन गर्ने भएको छ । भ्रमण भिसामा गएर मानिस ठगिएको गुनासो आएपछि नेपाल प्रहरीको मानव बेचबिखन अनुसन्धान ब्यूरोले अनियमितता तथा ठगी नियन्त्रणका लागि वैदेशिक रोजगार विभागमा प्रहरी टोली परिचालन भएको हो ।
वैदेशिक रोजगार ऐनमा यससम्बन्धी उजुरी प्रहरीले लिन सक्ने व्यवस्था छ । सोही अनुसार गृह र श्रम रोजगार तथा सामाजिक सुरक्षा मन्त्रालयको समन्वयमा ब्यूरोबाट प्रहरी टोली पठाइएको हो । नेपाल प्रहरीको मानव बेचबिखन अनुसन्धान ब्यूरोबाट प्रहरी नायब उपरीक्षकको नेतृत्वमा सात सदस्यीय प्रहरी टाली परिचालन गरिएको ब्यूरोका प्रहरी उपरीक्षक राजेन्द्रप्रसाद धमलाले जानकारी दिए ।उक्त टोलीले विभागसँगको समन्वयमा काम गर्ने जनाइएको छ ।
उनका अनुसार मंगलबारदेखि सादा पोशाकमा टोली परिचालन भएको छ । केहीअघि भ्रमण भिसामा गएर मानिस ठगिएको गुनासो आएपछि गृह मन्त्रालयको समेत ध्यानाकर्षण भएको थियो । यस कार्यलाईसमेत टोलीले निगरानी गर्ने बताइएको छ । मन्त्रालयले सो टोलीलाई उजुरी लिने, अनुसन्धान गर्ने तथा पक्राउ गर्नेसम्मको अधिकार दिएको छ । हाल टोली सादा पोशाकमा रहेको र आवश्यकतानुसार परिचालन हुने ब्यूरोले जनाएको छ ।
