काठमाडौं– सरकारले हालै वितरण सुरु गरेको विद्युतीय राहदानी (ई–पासपोर्ट) विभिन्न देशबाट पनि वितरण थालेको छ । विदेशस्थित नेपाली दूतावासहरूबाट पासपोर्ट वितरण सुरु गरिएको हो । केही दिनपहिले कतारस्थित नेपाली दूतावासबाट वितरण सुरु गरिएकोमा मलेसियामा रहेको नेपाली दूतावासबाट पनि विद्युतीय राहदानी वितरण गर्न थालिएको छ । बुधबार एक कार्यक्रमकाबीच दूतावासले विद्युतीय राहदानीको लाइभ इनरोलमेन्टको सफल परीक्षण गर्दै विद्युतीय राहदानी जारी गर्न थालेको छ ।
दूतावासले राहदानी नवीकरण गर्न आएका श्यामकुमार चौधरीको राहदानी नवीकरणको लाइभ इनरोलमेन्ट गरी विद्युतीय राहदानीको सुरुवात गरिएको जनाएको छ । दूतावासबाट लाइभ इनरोलमेन्ट गरिएको राहदानी विभागबाट प्रिन्टसमेत गरेर सफलताका साथ परीक्षण गरिएको छ । दूतावासले पहिलो दिनमा नै ३३ जनाको राहदानी नवीकरणका लागि लाइभ इनरोलमेन्ट गरेको जनाएको छ ।
दूतावासले सुरुवातको एक हप्ता सीमित व्यक्तिलाई मात्र अनलाइन बुकिङको आधारमा सेवा दिने र त्यसपछि नियमित रूपमा विद्युतीय राहदानी जारी गर्ने छ ।
दूतावासबाट विद्युतीय राहदानीको लाइभ इनरोलमेन्ट कार्यक्रममा भर्चुअल माध्यमबाट राहदानी विभागका महानिर्देशक डोरनाथ अर्याल पनि सहभागी भएका थिए ।
मलेसियाका लागि कार्यवाहक राजदूत मोतीबहादुर श्रीसले सेवाग्राहीको चापलाई सहज रूपमा व्यवस्थापन हुने गरी सेवा प्रवाहको स्टेसनहरूको व्यवस्थापन गर्ने प्रतिबद्धता जनाएका छन् । दूतावासका अनुसार मलेसियामा २ लाखभन्दा धेरै नेपालीहरू रहेका छन् ।
-1745656903.jpeg)