काठमाडौं– नेपालीहरूको आकर्षक गन्तव्य मुलुक दक्षिण कोरियाले अवैध कामदारलाई आङ्खनो मुलुक छाड्ने अवसर दिएको छ । कोरोना भाइरसविरुद्धको खोप बुस्टर डोज समेतलगाएका अवैधानिक आप्रवासीलाई बिना जरिबाना कोरिया छाड्ने अवसर दिएको हो । विदेशी नागरिकलाई कोरोनाको बुस्टर डोज खोप लगाउन प्रोत्साहन गर्नका लागि कोरियाले यो योजना ल्याएको कोरियाको न्याय मन्त्रालयलाई उदृत गर्दै त्यहाँ रहेको नेपाली दूतावासले जनाएको छ ।
३० अप्रिल २०२२ सम्म कोरियामा कोरोना खोपको तेस्रो (बुस्टर) डोज लगाएका र ३१ अक्टोबर २०२२ सम्म स्वेच्छाले कोरिया छाड्ने अवैधानिक विदेशी नागरिकलाई जरिबाना छुट र प्रवेश प्रतिबन्धमा पनि फुकुवा गरिने त्यहाँ सरकारले जनाएको छ ।
कोरियास्थित नेपाली दूतावासका अनुसार २८ फेब्रुअरी २०२२ सम्ममा पूर्ण रूपमा खोप लगाएका र ३० अप्रिल २०२२ सम्ममा स्वेच्छाले कोरिया छाड्ने अवैध कामदारलाई जरिबाना छुट र प्रवेश प्रतिबन्ध भने निलम्बन हुने छ । आपराधिक कार्यमा संलग्न, खोप नलगाएका व्यक्तिहरू, कोभिड प्रतिबन्धको उल्लंघन गर्नेहरू र अध्यागमन अधिकारीहरूले पक्राउ गरेका अवैध विदेशी नागरिकको हकमा भने यो योजना लागू नहुने त्यहाँको अध्यागमनले जनाएको छ । यो सुविधा पप्त गर्नका लागि खोप लगाएको इ प्रमाणीकरण वा प्रिन्ट कपी पेस गर्नुपर्ने कोरिया सरकारले जनाएको छ । स्वैच्छिक रूपमा स्वदेश फर्कनका लागि कोरियाको अध्यागमन कार्यालयमा गएर वा अनलाइन आवेदन भरेर बन्दरगाह वा एयरपोर्टमार्फत त्यसै दिन कोरिया छाड्न सकिन्छ ।
यसरी फर्कँदा लाग्ने जरिबाना सबै छुट हुनेछ भने प्रवेश प्रतिबन्ध निलम्बनबाट समेत छुट पाउन सकिन्छ । आवेदन प्रस्थानको मितिभन्दा कम्तीमा तीन दिन अघि पेस गर्नुपर्ने बताइएको छ ।
कोरियामा पछिल्लो समय ओमिक्रोन भेरियन्ट संक्रमण बढिरहेको छ । तर, खोप लगाउने विदेशी नागरिकको संख्या कम छ । विदेशी नागरिकमा संक्रमण बढ्दै गएकाले समुदायस्तरमा कोरोना फैलनबाट रोक्न कोरियाको न्याय मन्त्रालयले अपनाएका विभिन्न उपाय मध्ये यो योजना पनि रहेको दूतावासले विज्ञप्तिमार्फत उल्लेख गरेको छ । दक्षिण कोरिया नेपाली श्रमिका लागि पनि आकर्षक गन्तव्य मुलुक हो । सरकारले इपिएस प्रणालीमार्फत कोरिया कामदार पठाउने गरेको छ । त्यसबाहेक अन्य उपाय लगाएर पनि धेरै नेपाली कोरिया पुगेको बताइन्छ । त्यहाँ गएर अवैध बसोबास गरिरहेका नेपाली श्रमिकहरूले पनि यसको लाभ उठाउन सक्ने कोरियास्थित नेपाली दूतावासले जनाएको छ ।
-1745656903.jpeg)