काठमाडौं– वैदेशिक रोजगार व्यवसायीहरूले आत्मरक्षा टोली निर्माण गरेका छन् । विभिन्न बहानामा व्यवसायीलाई दुःख दिने गरेको भन्दै बुधबार नेपाल वैदेशिक रोजगार व्यवसायी एकता समिती सामाखुसीले आयोजना गरेको व्यवसायी भेलाबाट आत्मरक्षा टोली निर्माण गरिएको हो ।
व्यवसायीको हक हितका लागि काम गर्ने जिम्मेवारीका साथ भेलाले तीन वटा टोली गठन गरेको हो । जसअनुसार सामखुसी प्रहरी विटदेखि बालाजुसम्मको एउटा, प्रहरी चौकी सामाखुसीदेखि महाराजगन्जसम्मको अर्को र चक्रपथदेखि चावहिलसम्मको अर्को टोली निर्माण गरिएको एकता समाजका अध्यक्ष हरिबहादुर पाण्डे क्षेत्रीले बताएका छन् । जसअनुसार सामाखुसी बालाजुको ५१ सदस्यीय टोलीको संयोजकको जिम्मेवारी तारानाथ अर्याललाई दिइएको छ । त्यस्तै, सामाखुसी प्रहरी चौकीदेखि चक्रपथसम्मको ३५ सदस्यीय टोलीको संयोजकको जिम्मेवारी मिलन कट्टेल र चक्रपथ चावहिलको २१ सदस्यीय टोलीको संयोजकमा गोविन्द कटुवाल रहेको पाण्डे क्षेत्रीले बताए । बुधबार गठन गरिएको आत्मरक्षा टोलीले व्यवसायीलाई दुःख दिनेहरूविरुद्ध रक्षा कवजको काम गर्ने बताइएको छ । सो भेलामा बोल्ने अधिकांश व्यवसायीहरूले वैदेशिक रोजगार व्यवसायीलाई दुःख दिने काम रोक्नु पर्ने र त्यसो हुन नसकेको खण्डमा आफूहरू प्रतिकारमा उत्रनेसमेत बताएका छन् ।
नेपाल वैदेशिक रोजगार व्यवसायी संघका पूर्व अध्यक्ष रोहण गुरुङले सरकारले संघलाई चिन्ने भएकाले संघ बलियो बनाउनु पर्ने धारणा व्यक्त गरे । संघले नीति निर्माणमा कुनै भूमिका नखेल्ने बरु व्यवसायीको हितविपरीतको नीति बन्न लागेको भए त्यसलाई रोक्नका लागि सक्दो प्रयास गर्ने उनले बताएका छन् । आत्मरक्षा टोली कसैका विरुद्धमा लड्नका लागि नभएर व्यवसायीलाई समस्या पर्दा सहयोग गर्ने हिसाबले निर्मँण गरिएको उनले बताए ।
यता, नेपाल लोकतान्त्रिक वैदेशिक रोजगार व्यवसायी एसोसिएसनका अध्यक्ष नरेन्द्र ढकालले व्यवसायीमाथि अनधिकृत व्यक्तिले दुःख दिइरहेको भन्दै त्यसतर्फ सुरक्षा निकायको ध्यान जान जरुरी रहेको बताएका छन् । एकता विरोधी गतिविधिले संघले नेतृत्व नपाएको बताएका उनले अहिलेको अवस्थामा सबै व्यवसायी मिल्नुको विकल्प नरहेको उनले बताए । साथै उनले धरौटी राखेर व्यवसाय गरिरहेका व्यवसायीलाई आतंकित बनाउने गरी सरकारले मार्सल टोली बनाएको भन्दै आपत्तिसमेत जनाए ।
प्रगतिशिल वैदेशिक रोजगार व्यवसायी मञ्च नेपालका कार्यवाहक अध्यक्ष राजेन्द्र भण्डारीले अर्थतन्त्रको मेरुदण्डका रूपमा रहेको यो क्षेत्रलाई अस्थिर बनाउनेतर्फ सबै लागिरहेको आरोप लगाएका छन् । मन्त्री तथा सचिवहरू जति आए पनि व्यवसायीहरू सबै गलत नै छन् कारबाही गरेर ठीक पार्नुपर्छ भन्ने भावनाका आउने गरेकाले पनि समस्या भएको उनले बताए ।
कार्यक्रममा बोल्दै एकता समितिका सचिव तारानाथ अर्यालले पछिल्लो समय युट्युवरहरूले व्यवसायीलाई दुःख दिने गरेको भन्दै यस्ता कार्यहरू रोक्नु पर्ने बताएका छन् । व्यवसायीको सुरक्षाको प्रतिभूतिका लागि भेलाको आयोजना गरेको भन्दै व्यवसायीलाई नियमन गर्ने निकायहरू रहेको भन्दै सम्बन्धित ठाउँमा गएर उजुरी गर्नुपर्ने उनले बताए । सो अवसरमा उनले व्यवसायीलाई पनि कानुनको अधिनभन्दा बाहिर गएर कार्य नगर्नका लागि आग्रह गरे ।
त्यस्तै, कार्यक्रमलाई सम्बोधन गर्दै एकता समितिका अध्यक्ष पाण्डेले व्यवसायीको हक हित र संरक्षणका लागि टोली गठन गर्नु पर्ने अवस्था आएको बताएका छन् । गैर व्यवसायीमार्फत भिजिट भिसामा विदेश जाने गरेको, तर पछि दोष व्यवसायीलाई दिने कार्य भइरहेको भन्दै त्यस्ता गतिविधि रोक्न उनले मागसमेत गरे । व्यवसायीहरूले पनि सच्चिनु पर्ने भन्दै गलत नगर्न र गलत नगर्दा नडाउन उनले सबै व्यवसायीलाई आग्रह गरे ।
पछिल्लो समय व्यवसायीको छाता संगठन नेपाल वैदेशिक रोजगार व्यवसायी संघ कमजोर बनेको अवस्थामा सबैले व्यवसायीलाई प्रहार गरेको पनि उनको धारण थियो । व्यवसायीको हक हितका लागि आवाज उठाउनका लागि सबै व्यवसायी एक भएर अगाडि बढ्नुपर्ने आजको आवश्यकता रहेको पाण्डे क्षेत्रीको भनाइ थियो । यता, अधिवक्ता देवराज कटुवालले भने पेसा र व्यवसाय गर्न पाउने हक रहेकाले कानुनको परिधिमा रहेर व्यवसाय गर्न पाइने बताए । मंगलबार भएको घटना दुःखद् भएको भन्दै त्यस्तो अवस्था आउन नहुने उनको भनाइ थियो ।
कार्यक्रममा तराई मधेस लोकतान्त्रिक वैदेशिक रोजगार व्यवसायीका अध्यक्ष अख्तर हुसेनले देश र जनताको पेट पाल्ने व्यवसायीले हिनताबोध गर्नुपर्ने अवस्था आएको बताएका छन् । सबै क्षेत्रलाई चलायमान बनाउने क्षेत्र पहिले आफैँ सम्मानित हुनु पर्ने उनले बताए ।
