काठमाडौं– सरकारले आकर्षक रोजगारीको लोभ देखाएर पर्यटक (भिजिट) भिसामा विदेश पठाउनेहरूलाई कारबाही थालेको छ । भिजिट भिसामा विदेशमा गएर नेपालीहरू अलपत्र परेको समाचार सार्वजनिक भएपछि सरकारले त्यस्ता व्यक्ति तथा संस्थाहरूलाई कारबाही गर्न थालेको हो ।
पछिल्लो समय भिजिट भिसामा पठाउनेहरूविरुद्ध सरकार कडा रूपमा प्रस्तुत भएको जनाएको छ । सरकार कडा रूपमा प्रस्तुत भएपछि त्यसरी विदेश पठाउने कन्सल्टेन्सी तथा ट्राभल एजेन्सीहरूले विदेश पठाएकाहरूलाई स्वदेश फिर्ता पठाउन थालेको श्रम रोजगार तथा सामाजिक सुरक्षा मन्त्रालयले जनाएको छ । पछिल्लो समय युएई तथा अन्य खाडी मुलुकहरूमा नेपालीहरू भिजिट भिसामा गएर अलपत्र पर्ने गरेको बताइएको छ ।
अहिले विदेश पठाएका कन्सल्टेन्सी तथा ट्राभल एजेन्सीहरूले अलपत्र परेकाहरूलाई फर्काउन थालेको श्रम रोजगार तथा सामाजिक सुरक्षा मन्त्रालयका सहायक प्रवक्ता डा. थानेश्वर भुसालले बताएका छन् । सरकार कडा रूपमा प्रस्तुत भएसँगै अलपत्र परेका व्यक्तिहरू फर्काउन थालेको जानकारी भए पनि कति व्यक्ति फर्किए भन्ने जानकारी नभएको सहायक प्रवक्ता भुसालले बताए ।
श्रम, रोजगार तथा सामाजिक सुरक्षामन्त्री कृष्णकुमार श्रेष्ठले केही दिनअघि मात्रै यस्तो अलपत्र पार्नेविरुद्ध सरकार कडा रूपमा प्रस्तुत हुने बताएका थिए । नेपाली नागरिक अलपत्र पार्ने जो भए पनि नछाड्ने मन्त्री श्रेष्ठले बताएका थिए । यदि यस्तोगरी कसैले अलपत्र पारेको खण्डमा मन्त्रालयमा स्थापना गरिएको कल सेन्टरमा सम्पर्क गरेर जानकारी दिन पनि मन्त्री श्रेष्ठले आग्रह गरेका छन् ।
अहिले मन्त्रालयमा नै कल सेन्टर स्थापना गरिएको छ । यो कल सेन्टर २४सै घन्टा खुला रहने बताइएको छ । पछिल्लो समय श्रम गन्तव्य मुलुकमध्ये युएईमा मात्रै ५५ प्रतिशतले गैर श्रमिक भिसालाई वैधानिकीकरण गरेको वैदेशिक रोजगार विभागले जनाएको छ । गत वर्ष युएईमा २ हजार ८९१ जनाको भिसा परिवर्तन भएको देखिएको विभागले जनाएको छ । त्यस्तै कतारमा पनि ६८६ जनाले भिसा परिवर्तन गरेको देखिएको छ ।
सरकारले पछिल्लो समय विदेशमा अलपत्र परेकाहरूको उद्धार गर्नका लागि मार्सल टोली नै गठन गरेको छ । मन्त्रालयका उपसचिव विष्णु लामिछानेको नेतृत्वमा मार्सल टोली गठन गरिएको छ । सो टोलीले भिजिट भिसामा विदेश पठाउनेहरूलाई कारबाही गर्ने जिम्मेवारी पाएको छ । सो टोलीले शुक्रबारबाट नै काम थालेको बताइएको छ । सो टोलीमा श्रम, गृह र परराष्ट्र मन्त्रालयका प्रतिनिधि रहने बताइएको छ ।
