काठमाडौं– नेपालीहरूको श्रम गन्तव्य मुलुकहरूले यन्त्रवाचक राहदानी अर्थात् मेसिन रिडेबल पासपोर्ट (एमआरपी) नवीकरण कार्य स्थगित गरिएको छ । केहीपछि नै विद्युतीय राहदानी (ई–पासपोर्ट) जारी गर्ने तयारी भइरहेको भन्दै ती देशहरूमा रहेका नेपाली दूतावासहरूले एमआरपी राहदानी नवीकरणको कार्य स्थगित गरेका हुन् ।
नेपालीहरूको प्रमुख गन्तव्य मुलुक कतार, साउदी अरब, कुवेत, मलेसियालगायतमा एमआरपी राहदानी नवीकरण कार्य स्थगित गरिएको हो । दूतावासहरूले सूचना निकालेर एमआरपी राहदानी नवीकरणको कार्य स्थगित गरिएको जानकारी गराएका छन् ।
तत्काल अत्यावश्यक नभएको खण्डमा राहदानी नवीकरण नगर्न र केही समयपछि विद्युतीय राहदानी वितरण गरिने दूतावासहरूले जारी गरेको सूचनामा उल्लेख गरिएको छ । नेपालीहरूको प्रमुख श्रम गन्तव्यका रूपमा रहेको साउदी अबरले ३० जनवरीदेखि १७ फेब्रुअरीसम्मका लागि एमआरपी नवीकरण कार्य स्थगित गरिएको जनाएको छ । दूतावासले सूचना जारी गर्दै तत्काल अत्यावश्यक नभएमा राहदानी नवीकरणका लागि आवेदन नदिन पनि अनुरोध गरेको छ । साथै अत्यावश्यक परेको खण्डमा भने दूतावासमा अग्रिम सम्पर्क गरेर आउनका लागि अनुरोध गरेको छ । अग्रिम समय नलिई आउनेहरूको आवेदन नलिइने दूतावासले जनाएको छ ।
यता अर्को श्रम गन्तव्य मुलुक कतारले पनि एमआरपी राहदानी नवीकरण कार्य स्थगित गरेको छ । दूतावासले सूचना जारी गरेर नेपाल सरकारले विद्युतीय राहदानी जारी गर्ने निर्णय गरेको भन्दै त्यसको व्यवस्थापनका लागि एमआरपी राहदानी नवीकरण स्थगित गर्नु परेको जनाएको छ । दूतावासले १६ माघ अर्थात् ३० जनवरीदेखि अर्को सूचना जारी नगरेसम्मका लागि एमआरपी राहदानी नवीकरण स्थगित गरिएको सूचनामा भनिएको छ ।
दूतावासले अत्यावश्यक अवस्था अर्थात् कतार बसाइँ अवैधानिक हुने अवस्थामा पुगेकाहरूबाहेक अन्यको राहदानी नवीकरण आवेदन नलिइने बताइएको छ । राहदानी हराएका वा म्याद सकिएर जरुरी अवस्थामा नेपाल जानेहरूको हकमा यात्रा अनुमति पत्र जारी गरिने र अन्यको हकमा राहदानी नवीकरण नहुने जनाइएको छ । त्यस्तै, मलेसियामा रहेको नेपाली दूतावासले पनि एमआरपी राहदानी नवीकरण स्थगित गरेको छ । क्वालालाम्पुरमा रहेको नेपाली दूतावासले केही दिनमा ई–पासपोर्ट जारी गर्ने तयारी भएको भन्दै एमआरपी राहदानी नवीकरणको कार्य स्थगित गरिएको दूतावासले जनाएको छ । ई–पासपोर्टका लागि विशेष प्रणाली जडान गर्नु पर्ने र राहदानी बनाउने तथा नवीकरण गर्ने कार्य रोकिएको जनाइएको छ ।
यता कुवेतले पनि हाललाई राहदानी नवीकरण स्थगित भएको जनाएको छ । कुवेतले पनि विद्युतीय राहदानीको तयारी गर्न भन्दै एमआरपी राहदानी नवीकरणको कार्य स्थगित गरिएको जनाएको छ ।
-1745656903.jpeg)