काठमाडौं– श्रम, रोजगार तथा सामाजिक सुरक्षा मन्त्रालयमा पुनः वैदेशिक रोजगारी सम्बन्धी गुनासो सुनुवाइ गर्ने गरी कल सेन्टर स्थापना गरिएको छ । यस अगाडि वैदेशिक रोजगार बोर्डको पहलमा मन्त्रालयमा राखिएको कल सेन्टर प्रभावकारी नभएपछि बोर्डले आङ्खनै भवनमा सञ्चालन गर्दै आएको थियो । तर, बोर्डमा रहेको कल सेन्टरले समेत अपेक्षाअनुसार काम नगरेको भन्दै श्रम, रोजगार तथा सामाजिक सुरक्षामन्त्री कृष्णकुमार श्रेष्ठले मन्त्रालयमै पुनः कल सेन्टर स्थापना गरेका हुन् ।
पछिल्लो समयमा वैदेशिक रोजगारीको प्रलोभन देखाएर पर्यटन तथा अन्य भिसामा खाडी क्षेत्रका विभिन्न मुलुकहरू, दक्षिणपूर्वी एसियाली मुलुकहरू, युरोपेली तथा अमेरिकी मुलुकहरू र अफ्रिकी महादेशका देशहरूमा गैरकानुनी रूपमा पुगेका नेपाली नागरिकहरू अलपत्र पारेको, ठगीमा परेको, विभिन्न समस्या तथा अप्ठ्यारोमा परेको भनी दिनहुँ गुनासो आउने गरेपछि मन्त्री श्रेष्ठको निर्देशनमा मन्त्रालयमै गुनासो सुनुवाइ कक्ष स्थापना गरिएको हो ।
अब कल सेन्टर तथा वैदेशिक रोजगारी सम्बन्धी गुनासो सुनुवाइ कक्षमार्फत वैदेशिक रोजगारीमा रहेका समस्या, गुनासो तथा सुझाव संकलन गरी एकीकृत गरिने मन्त्री श्रेष्ठको सचिवालयले जनाएको छ । सो कक्षमा आएका समस्या तथा गुनासोहरूलाई प्राथमिकीकरण गरी समाधान गरिने तथा सेवाग्राहीलाई आङ्खनो गुनासो सुनुवाइको अवस्थाबारे जानकारीसमेत दिइने मन्त्रीको सचिवालयले जनाएको छ । कल सेन्टर तथा वैदेशिक रोजगारी सम्बन्धी गुनासो सुनुवाइ कक्षमा कस्ता खालका समस्या र गुनासो आउँछन्, त्यसले सरकारलाई नीति निर्माणमा पनि सहयोग पुग्ने मन्त्री श्रेष्ठले बताएका छन् ।
कल सेन्टर तथा वैदेशिक रोजगारी सम्बन्धी गुनासो सुनुवाइ कक्षको उद्घाटन गर्दै मन्त्री श्रेष्ठले वैदेशिक रोजगारीको सन्दर्भमा नेपाली नागरिकलाई अलपत्र पार्ने जोसुकै संस्था वा व्यक्तिलाई प्रचलित कानुनबमोजिम कारबाहीको दायरामा ल्याउने र पीडितलाई न्याय दिलाउने बताएका छन् । मन्त्री श्रेष्ठले पीडितको गुनासो सुनुवाइका लागि प्रतिउत्तर कार्यटोली तथा प्रहरीको समेत सहभागितामा मार्सल टोली गठन गरी दोषीलाई कारबाही गर्न सुरु गरिएको बताएका हुन् ।
-1745656903.jpeg)