काठमाडौं– नेपाल सरकारले विदेशमा रोजगारीको लागि जाँदा श्रम स्विकृति नलिएर नजान आग्रह गरेको छ । पछिल्लो सयम खाडीलगायत मुलुक पुगेर नेपाली अलपत्र परेका विषय सार्वजनिक भएसँगै नेपाल सरकारले श्रम स्विकृति लिएर मात्र वैदेशिक रोजगारीमा जान अपिल गरेको हो ।
वैदेशिक रोजगारीको प्रलोभन देखाएर पर्यटन तथा अन्य भिसामा खाडी क्षेत्रका विभिन्न मुलुक, दक्षिणपूर्वी एसियाली मुलुक, युरोपेली तथा अमेरिकी मुलुक र अफ्रिकी महादेशका केही देशहरूमा गैरकानुनी रूपमा नेपाली पुगेर अलपत्र पर्ने गरेको भन्दै सरकारले यस्तो आग्रह गरेको छ । पछिल्लो समय नेपाली नागरिकलाई अलपत्र पारेको, ठगीमा परेको, विभिन्न समस्या तथा अप्ठ्यारामा परेको गुनासो आइरहेको भन्दै श्रम, रोजगार तथा सामाजिक सुरक्षा मन्त्रालयले यस्तो अपिल गरेको हो ।
राम्रो रोजगारी र आकर्षक तलब सुविधा पाउने लोभमा कानुनले तोकेको प्रक्रियाभन्दा बाहिरबाट वैदेशिक रोजगारीमा जान नमिल्नेतर्फ ध्यानाकर्षण गराउँदै मन्त्रालयले गन्तव्य मुलुकका बारेमा पूर्ण जानकारी लिई नियमअनुसार श्रम स्वीकृति प्राप्त गरेर मात्रै वैदेशिक रोजगारीमा जान आग्रह गरेको छ । पछिल्लो समय कोरोनाका कारण भिजिट भिसामा रोजगारीका लागि जाने क्रम बढेको र त्यसबाट नेपालीहरू अलपत्र पर्ने गरेको बताइएको छ ।
वैदेशिक रोजगारीको प्रलोभन देखाइ विदेशका कयौँ मुलुकमा नेपाली नागरिकलाई अलपत्र पारेको भनी इजाजतपत्र प्राप्त संस्था, शैक्षिक परामर्शदाता संस्था, ट्राभल्स एजेन्सी र विभिन्न विचौलियाविरुद्ध उजुरीहरू प्राप्त भएको श्रम मन्त्रालयले जनाएको छ । वैदेशिक रोजगारीको सन्दर्भमा नेपाली नागरिकलाई विदेशी भूमिमा अलपत्र पार्ने जो सुकै संस्था वा व्यक्तिलाई प्रचलित कानुनबमोजिम कारबाहीको दायरामा ल्याउन र पीडितलाई न्याय दिलाउन प्रतिबद्ध रहेको मन्त्रालयले जनाएको छ । सरकारले वैदेशिक रोजगारीमा पुगेर पीडित बनेकालाई न्याय दिलाउन गृह मन्त्रालयका सहसचिवको संयोजकत्वमा कार्यदलसमेत गठन गरेको छ । श्रम मन्त्रालयलेसमेत वैदेशिक रोजगार विभागका निर्देशकको संयोजकत्वमा तत्काल प्रतिउत्तर कार्यटोली र यस मन्त्रालयका उपसचिवको संयोजकत्वमा मार्सल टोली गठन गरिसकेको छ ।
-1745656903.jpeg)