काठमाडौ– साउदी अरबमा रहेको नेपाली दूतावासले राम्रो रोजगारीको प्रलोभनमा परेर गरिरहेको काम नछाड्न अनुरोध गरेको छ । त्यहाँ रहेका नेपालीलाई विभिन्न फोन नम्बरबाट फोन आउने र राम्रो काम लगाइदिने प्रलोभन दिने गरिएको भन्दै यस्तो कार्यबाट जोगिनका लागि दूतावासले सबैलाई आग्रह गरेको हो ।
राम्रो जागिरको प्रलोभनमा पारेर ठगी गर्ने गरेको भन्दै दूतावासले सजग गराएको जनाएको छ । दूतावासमा अहिले यस्ता गुनासाहरु आइरहेको भन्दै यसप्रति ध्यानाकर्षण भएको भन्दै दूतावासले सूचना निकालेर यस्तो आग्रह गरेको छ ।
साउदी आएर भर्खरै मात्र इकामा बनाएका श्रमिकलाई खाइपाई आएको तलब र सुविधाभन्दा बढी दिने काम लगाइदिने बहाना बनाउने र रोजगारी छाड्न लगाई गैरकानुनी हिसाबले काममा लगाउने गरेको पाइएको दूतावासले जारी गरेको सूचनामा जनाएको छ । साउदीमा कम्पनी छाडेर भाग्नु गैरकानुनी र अनैतिक मानिने भएकाले यसरी काम गरिरहेका श्रमिकलाई भगाउनु अपराध भएको दूतावासले जनाएको छ । दूतावासका अनुसार यसरी गरिरहेको काम छाडेर भाग्दा साउदीका रोजगारदाताले नेपाली श्रमिकलाई शंकाको दृष्टिकोणले हेर्ने र उनीहरूप्रति अविश्वास बढ्दै गएको छ ।
एउटा कम्पनीको अकामा लिएर भाग्ने प्रवृत्तिलाई निरुत्साहित गर्न र कामदारलाई सचेत गराउन दूतावासमा साउदीका अधिकारीहरूले अनुरोधसमेत गरेका छन् । यसरी मानव तस्करीका रूपमा रहेको कामदार भगाउनेहरूको खोजी गरिरहेको भन्दै यस्तो कार्य नगर्न र नगराउन दूतावासले सबैलाई सचेत गराएको छ ।
साउदीमा गैरकानुनी हैसियतमा रहेका व्यक्ति बिरामी भएर उपचार गर्नुपर्दा अस्पताल छिर्न नपाउने, दुर्घटना भएर घाइते वा अंगभंग भएमा त्यसको उपचार र क्षतिपूर्तिसमेत नपाइने दूतावासले जनाएको छ । गैरकानुनी रूपमा रहेका श्रमिकको कुनै कारणबाट ज्यान गएमा शव नेपाल ल्याउने जिम्मासमेत कसैले नलिने भएकाले यस्तो प्रलोभनमा नपर्न दूतावासले सबै नेपालीलाई आग्रह गरेको छ ।
-1745656903.jpeg)