काठमाडौं– अनलाइनबाट सेवा प्रवाह गर्न सुरु गरिपछि वैदेशिक रोजगार कार्यालय ताहाचल सुनसान देखिएको छ । श्रम स्विकृति र पुनः श्रम स्विकृतिको काम गर्नका लागि सरकारले अनलाइन प्रणालीबाट सेवा प्रवाह गर्न सुरु गरेपछि अहिले ताहाचलमा रहेको कार्यालय सुनसान देखिएको हो ।
अहिले पनः श्रम स्विकृतिका लागि सबैलाई अनलाइन प्रणालीबाटै सेवा प्रभाव गरिरहेको र नयाँ श्रम स्विकृति लिनेहरूलाई पनि आधाभन्दा बढीलाई अनलाइनबाट सेवा दिने गरिएको वैदेशिक रोजगार कार्यालय ताहचालका निर्देशक तथा सूचना अधिकारी हरिराम नागिलाले बताएका छन् । उनका अनुसार अहिले दैनिक पुनः श्रम स्विकृति लिनेको संख्या १ हजारको हाराहारीमा रहेको छ र उनीहरू सबैलाई अनलाइनबाट सेवा दिने कार्य भइरहेको छ । त्यस्तै नयाँ दैनिक ४–५ सय जनालाई अनलाइनबाट सेवा प्रभाव गरिरहेको उनले बताए ।
‘अहिले भौतिक रूपमा हुने भिडभाड कम भएको छ र विचौलियामुक्त कार्यालय बनाउने उद्देश्यअनुसार काम भइरहेको छ,’ सूचना अधिकारी नागिलाले भने । कार्यालयले गत वर्षदेखि नयाँ श्रम स्विकृति अनलाइनबाट जारी गर्दै आएकामा यही २ माघदेखि पुनः श्रम स्विकृति पनि अनलाइनबाटै दिन थालेको हो । कार्यालयबाट पहिलो दिन ८ सय ५५ जनाले अनलाइनबाट पुनः श्रम स्विकृति लिएको सूचना अधिकारी नागिलाले बताए ।
कार्यालयमा हुने भिडभाड तथा कोरोना संक्रमण जोखिमको बेला अनलाइनबाट श्रम स्विकृति दिने विषय प्रभावकारी बनेको कार्यालयका उनले बताएका छन् । यसअघि दैनिक १ हजार बढी सेवाग्राहीको भौतिक उपस्थितिमा सेवा प्रवाह गर्दा कोरोना संक्रमण बढ्ने, कर्मचारी र सेवाग्राहीबीच अनुचित आर्थिक लेनदेन हुने गुनासो आउने आइरहेको भन्दै गरेको थियो । त्यस्तै सेवाग्राहीको चाप बढी हुँदा कर्मचारीले रातिसम्म काम गर्नुपर्ने बाध्यता थियो ।
कार्यालयले संस्थागत श्रम स्विकृति, पुनः श्रम स्विकृति र व्यक्तिगत श्रम स्विकृति दिने गर्दै आएकोे छ । कार्यालयबाट औसत प्रतिदिन १ हजार ५ सय ६५ को अन्तिम श्रम स्विकृति जारी हुने नागिलाले बताएका छन् । श्रम, रोजगार तथा सामाजिक सुरक्षामन्त्री कृष्णकुमार श्रेष्ठले श्रम स्विकृतिलाई ‘पेपरलेस’ बनाउन निर्देशन दिएसँगै छिटो, छरितो र पारदर्शी र गुनासोरहित सेवाप्रवाह गर्न अनलाइन प्रणालीबाट पुनः श्रम स्विकृतिको काम सुरु भएको थियो ।
अनलाइनमा कागजात जाँच गर्न समय लाग्ने तथा कहिलेकाहीँ इन्टरनेट वा सर्भरको समस्या हुन सक्ने भएकाले कार्यालयले श्रम स्विकृतिका लागि तीन दिन अगाडि अनलाइन फाराम भर्न आग्रह गरेको छ । कर्मचारी कार्यालय नआएको दिन घरबाट समेत सेवा दिन सहज भइरहेको सूचना अधिकारी नागिलाले बताएका छन् । सेवाग्राहीले सही विवरण भरेमा सोही दिन नै श्रम स्विकृति दिन सकिने बताइएको छ । पुनः श्रम स्विकृतिका लागि म्यादी जीवन बिमा र वैदेशिक रोजगार कल्याण कोषको रकम अनलाइन भुक्तानी प्रदायक संस्थामार्फत भुक्तानी गर्नु पर्ने बताइएको छ ।
-1745656903.jpeg)