काठमाडौं– इजरायलका लागि भाषा परीक्षा पास गरेकामध्ये ९९ जना इजरायल उडेका छन् । यो सँगै नेपालबाट इजरायलको रोजगारीमा जानसमेत सुरु भएको वैदेशिक रोजगार विभाग इजरायल शाखाका प्रमुख तथा निर्देशक डम्बरबहादुर सुनुवारले बताएका छन् ।
भाषा परीक्षामा उत्तीर्ण भएका १ हजार ६ सय जनाको नाम इजरायल पठाइएको र पहिलो चरणमा ९९ जना बुधबार राति ११ बजे इजरायलका लागि उडेको उनले बताए । बुधबार इजरायल जानेमध्ये ६३ महिला र ३६ पुरुष रहेको बताइएको छ । ‘पहिला पनि इजरायल गएको भए पनि भाषा परीक्षा उत्तीर्ण गरेर गएको यो पहिलो हो, अब भाषा परीक्षा पास गरेका अरु श्रमिक पनि इजरायल जान्छन्,’ निर्देशक सुनुवारले भने । यसपछि भने २९ जनवरीको र १ फेब्रुअरी अर्थात् माघ १५ र १६ गते दुई उडानमार्फत थप नेपाली श्रमिक इजरायल जाने निर्देशक सुनुवारले बताएका छन् । ती दुई उडानमार्फत थप १ सय ६२ जना इजरायल जाने बताइएको छ ।
भाषा परीक्षा पास गरेकामध्ये ९ सय ४३ जना श्रमिकको सम्झौता भइसकेको र बाँकीको पनि आउने क्रम जारी रहेको निर्देशक सुनुवारले बताएका छन् । इजरायलको दीर्घकालिन सेवा केन्द्रमा रोजगारीका लागि १ हजार जान कोटा तोकेर नेपाल सरकारले परीक्षा लिएको थियो । तर नेपालको तर्फबाट १ हजार ६ जनाको नाम इजरायल पठाइएको उनले बताए । ‘कति जनाको नाम सम्झौताका लागि पठाउँछ त्यसको बारेमा अहिले केही भन्न सकिँदैन, उताबाट आउने क्रम जारी छ, १ हजार जना भन्ने कुरा पनि केही गरेका छैनन्,’ निर्देशक सुनुवारले भने ।
नेपाल सरकार र इजरायल सरकारबीच १४ असोज ०७७ मा श्रम सम्झौता भएको थियो । श्रम सम्झौतापछि विभागले विज्ञापन सुरु गरेको २५औँ हप्तामा नेपाली कामदारलाई इजरायल पठाउने टुंगो लागेको हो । इजरायलको रोजगारदाताले हस्ताक्षर गरी विभागमा पठाएको सम्झौतापत्रमा अहिलेसम्म नौ सय ९४ जना कामदारसँग सम्झौता भइसकेको छ ।
