काठमाडौं– मलेसियाले विदेशी श्रमिकहरका लागि जनवरी अन्तिमदेखि अनलाइन आवेदन लिने भएको छ । मलेसियाको प्लान्टेसन क्षेत्रमा रोजगारीका लागि आगामी २८ जनवरीदेखि श्रमिक लिन अनलाइन आवेदन लिन सुरु गर्ने भएको हो ।
मलेसियामा मानव संशाधन मन्त्री एम शरभनानलाई उद्धृत गर्दै वेभसाइटमार्फत श्रमिकको आवेदन लिन थालिने बताएको स्थानीय सञ्चार माध्यमहरूले जनाएका छन् । समाचारअनुसार प्लान्टेसनबाहेक अन्य क्षेत्रका लागि भने १५ फेब्रुअरीदेखि आवेदन खुल्नेछ । मलेसिया सरकारले श्रमिकको अभावका कारण गत सेप्टेम्वरमा ३२ हजार विदेशी श्रमिक ल्याउन पाउने गरी निर्णय गरेको थियो । कोरोनाका कारण पछिल्लो समयमा मलेसियाले विदेशी श्रमिक लिने नीतिमा केही कडाइ गर्दै आएको छ ।
स्वदेशी नागरिकलाई नै रोजगारीमा आकर्षित गर्ने प्रयास गरिरहेको मलेसियामा कोभिड–१९ को समस्या सुरु भएपछि विदेशी श्रमिक लैजानका लागि अझ कडाइ गरिएको छ । अहिले पनि मलेसियामा नेपाली श्रमिक जान पाएका छैनन् । मलेसियाको मन्त्रिपरिषदले गत १० डिसेम्बरमा कृषि, उद्योग, सेवा, खानी, निर्माण तथा घरेलु क्षेत्रमा विदेशी श्रमिक लिने नीति लिएको समाचारमा जनाइएको छ ।
मानव संशाधन मन्त्री शरभनानका अनुसार मलेसिया आउने विदेशी श्रमिकले ७ दिन भने अनिवार्य क्वारेन्टाइनमा बस्नु पर्नेछ । सो समयमा त्यसरी आउने श्रमिकको दुईपटक कोभिड परीक्षण गर्नु पर्ने बताइएको छ । साथै त्यसबापतको खर्च रोजगारदाताले बेहोर्नु पर्ने समाचारमा जनाइएको छ । मलेसियाले क्लाङमा रहेका होटल तथा क्वारेन्टाइन केन्द्रहरूलाई यसका लागि उपयोग गरिने र त्यहाँ एकपटकका लागि १० हजार व्यक्तिलाई राख्न सकिने समाचारमा जनाइएको छ ।
-1745656903.jpeg)