काठमाडौं– नेपाल वैदेशिक रोजगार व्यवसायी एकता समिति सामाखुशीका अध्यक्ष हरिबहादुर पाण्डे क्षत्रीले समानान्तर संघ बन्ने बताएका छन् । नेपाल वैदेशिक रोजगार व्यवसायी संघको चुनाव स्थगित भएपछि पत्रकारसँग कुरा गर्दै अध्यक्ष पाण्डेले नियोजित रूपमा संघको चुनाव स्थगित गरिएको भन्दै सहमतिअनुसार अगाडि नबढे समानान्तर संघ निर्माण गरिने बताएका हुन् ।
‘गल्ती कमजोरी सुधार नहुने हो भने, समानान्तर संघ बन्छ, त्यसको नेतृत्व प्रगतिशिल वैदेशिक रोजगार व्यवसायी मञ्चले गर्छ,’ अध्यक्ष पाण्डेले भने । यो मञ्चको आधिकारिक धारणा हो भन्ने पत्रकारहरूको प्रश्नमा उनले भने ‘आधिकारिक धारणा हो, व्यावसायीका हक हितका विपरीत कार्य गर्नेहरूलाई नांगेझार पार्नुपर्छ ।’ व्यावसायीको हक हितमा काम गर्नका लागि सर्वसम्मत रूपमा नेतृत्व चयन गर्ने गरी सहमति भएको र त्यसको पालना नभएको भन्दै यसमा सर्वसम्मतिको कुरा गर्नेहरू नै संलग्न रहेको पाण्डेले आरोप लगाएका छन् । मञ्चका तर्फबाट सर्वसम्मत नेतृत्व छनोट समितिमा रहेको कार्यवाहक अध्यक्षले बोलाएको बैठकमा अन्य व्यक्तिहरू नआएकाले यसको पुष्टी भएको उनले बताए ।
संघको अहिलेको कार्य समिति र कार्यबाहक अध्यक्षलाई निर्वाचन कमिटी भंग गर्ने अधिकार नभएको भन्दै यस्तो कार्यको आफूले भत्र्सना गर्ने बताएका छन् । संघका अध्यक्षको निधनपछि अवैधानिक बनिसकेको संघलाई अहिलेसम्म साथ दिएको र अब साथ दिन नसकिने उनले बताए । साथै उनले व्यवसायीको लेभी र उम्मेदवारी दर्ता गर्दाको रकम पनि फिर्ता गर्नका लागि माग गरेका छन् । ‘काम नभएको अवस्थामा व्यवसायीले अभिभावक संस्थामा नयाँ नेतृत्व आउँदा सहज होला भनेर तिरेको लेभी फिर्ता गर्नु पर्छ, साथै उम्मेदवारको शुल्क पनि फिर्ता गर्नु पर्छ,’ पाण्डेले भने । रकम फिर्ता नगरे आपूmले संघमा ताला लगाउने र ताला किनेरसमेत राखिसकेको बताएका छन् ।
सोही अवसरमा उनले चुनावको लागि उठेको रकम हिनामिना गर्न खोजिएको आरोपसमेत लगाएका छन् । ‘अहिले करिब ९५ लाख रकम उठेको र यो रकम फजुल खर्च गर्न खोजिएको छ,’ उनले भने । अहिले रबर स्ट्याम्प अध्यक्ष ल्याउने खोजिएको उनले बताएका छन् । साथै व्यवसायीको हक हितमा लामो समयदेखि काम गर्दै आएको र त्यसका लागि पद आवश्यकसमेत नपर्ने उनले बताए । अहिले ऐतिहासिक रूपमा तेरो पार्टी र मेरो पार्टीभन्दा पनि सबैको प्रतिनिधित्व हुने गरी नेतृत्व आउन लागेको अवस्थामा यसलाई असफल गराउनेहरू व्यवसायी विरोधी भएको उनको आरोप छ ।
साथै उनले निर्वाचन समितिले सर्वसम्मत भएकाहरूको नामा तोकिएको मितिमा घोषणा गर्नु पर्ने र सहमतिविपरित उम्मेदवारी दिएमा सम्बन्धित संगठनले कारबाही गर्ने भनिएको सोहीअनुसार कारबाही गर्नु पर्ने बताए । ‘सहमति गर्दा कसैले उम्मेदवारी दिएमा सम्बन्धित संगठनले कारबाही गर्ने भनिएको थियो, त्यसविपरीत उम्मेदवारी दिनेलाई कारबाही गरिएको सूचना जारी गर्नु पर्छ, अनि उ सदस्य नभएपछि अर्को उम्मेदवारलाई सर्वसम्मत रूपमा निर्वाचित भएको घोषणा गर्नुपर्छ,’ अध्यक्ष पाण्डेले भने ।
निर्वाचनमा हार जित हुने तर सर्वसम्मतिका लागि आफू अध्यक्षबाट पछि हटेको भन्दै नियोजित रूपमा उम्मेदवारी दिन लगाइएको उनको आरोप छ । अहिलेको नेतृत्व लम्ब्याउनका लागि नियोजित रूपमा चुनाव रोकिएको उनले बताएका छन् । चुनाव रोक्ने कार्यले व्यवसायीमा निराशा उत्पन्न भएको बताएका पाण्डेले यो दिन संघको इतिहासमा कालो दिनका रूपमा दर्ज हुनेसमेत बताएका छन् ।
