काठमाडौं– नेपाल वैदेशिक रोजगार व्यवसायी संघको चुनाव स्थगित भएको छ । कोभिडलगायत विभिन्न समस्याका कारण यसपटक सर्वसम्मतिमा नेतृत्व चयन गर्ने गरी भएको सहमतिविपरीत उम्मेदवारी परेपछि चुनाव स्थगित भएको हो ।
सहमतिअनुसार नेपाल लोकतान्त्रिक वैदेशिक रोजगार व्यवसायी एसोसिएसनको भागमा परेको अध्यक्षमा नेपाल गणतान्त्रिक वैदेशिक रोजगार व्यवसायी मञ्चका पूर्वअध्यक्ष रामप्रसाद भन्तनाले पनि अध्यक्षमा उम्मेदवारी दिएका थिए । उनले अन्तिमसम्म पनि नाम फर्ता नलिएपछि चुनाव नै गर्नुपर्ने अवस्था सिर्जना भएको थियो । तर, सिसिएमसीको निर्देशनअनुसार हाललाई २५ जनाभन्दा बढी जम्मा हुन नपाइने भएपछि चुनाव स्थगित गरिएको संघका सचिव मेघनाथ भुर्तेलले बताएका छन् ।
अधिकांश पदमा उम्मेदवारी दिएकाहरूले नाम फिर्ता लिएको र बाँकीले अध्यक्षमा चुनाव नहुने अवस्थामा फिर्ता लिने बताएको र अध्यक्षमा सर्वसम्मति हुन नसकेका कारण चुनाव स्थगित भएको सचिव भुर्तेलले बताए । अब चुनाव गर्ने उपयुक्त वातावरण नभएसम्मका लागि चुनाव स्थतिग भएको उनले बताएका छन् । कोभिड–१९ को बढ्दो संक्रमणका कारण नेपाल सरकारले २५ जनाभन्दा बढी सार्वजनिक स्थानमा भेला नहुन निर्देशन दिइसकेको छ ।
यसैबीच, संघका कार्यवाहक अध्यक्ष कमल तामाङले एक विज्ञप्ति जारी गर्दै चुनाव स्थतिग भएको जानकारी दिएका छन् । कार्यबाहक अध्यक्ष तामाङले जारी गरेको विज्ञप्तिमा नेपाल बैदेशिक रोजगार व्यवसायी संघको २५औँ साधारण सभा तथा नयाँ कार्यसमितिको निर्वाचन प्रक्रियालाई सहज बनाउने उद्देश्यले संघका कार्यवाहक अध्यक्षको संयोजकत्वमा पूर्वअध्यक्षज्यूहरू तथा विभिन्न राजनीतिक संघ/संगठनका प्रतिनिधिहरूको संयुक्त बैठकले सर्वसम्मत नेतृत्व चयन गर्ने भनी गरिएको निर्णयविपरीत उम्मेदवार मनोनयन गरी सहमतिलाई लत्याउने कार्य भएको र सो सहमति कार्यान्वयन गर्न पटक–पटक समय थप गरी गरिएको प्रयास असफल भएको साथै मिति २६ पुस ०७४ मा जिल्ला प्रशासन कार्यालय काठमाडौंबाट जारी आदेशमा सार्वजनिक स्थानमा २५ जनाभन्दा बढी जम्मा भई भेला, गोष्ठी, सभा गर्न रोक लगाएको हुँदा अर्काे सूचना नआउँदासम्मका लागि संघको साधारण सभा तथा निर्वाचनको सम्पूर्ण प्रक्रिया स्थगित भएको उल्लेख छ ।
पूर्वसहमतिअनुसार नेपाली कांग्रेसनिकट एसोसिएसनले अध्यक्ष, सचिव, कोषाध्यक्ष र ५ जना सदस्य पाउने तय थियो । त्यसैगरी एमालेनिकट प्रगतिशील वैदेशिक रोजगार व्यवसायी मञ्चले प्रथम उपाध्यक्ष, ३ जना सदस्य र १ जना सल्लाहकार तथा एकीकृत समाजवादीनिकट एकीकृत वैदेशिक रोजगार व्यवसायी संगठनले महासचिव, ३ जना सदस्य र १ जना सल्लाहकार पाउने सहमति भएको थियो । माओवादीनिकटको नेपाल गणतन्त्रान्त्रिक वैदेशिक रोजगार व्यवसायी मञ्चले द्वितीय उपाध्यक्ष, ३ जना सदस्य, १ जना सल्लाहकार तथा समाजवादी फोरमनिकट संघले तृतीय उपाध्यक्ष, १ जना सदस्य र १ जना सल्लाहकार लिने गरी भागबन्डा गरिएको थियो ।
