काठमाडौं– नेपाल वैदेशिक रोजगार व्यवसायी एकता समिति सामाखुशीका अध्यक्ष हरिबहादुर पाण्डे क्षत्रीले व्यवसायीको हक हितका लागि पछि हटेको बताएका छन् । संघको निर्वाचन सर्वसम्मत रूपमा गर्ने भनेर निर्णय गरिएको र व्यावसायीको पक्षमा काम गर्नका लागि आफू प्रथम उपाध्यक्षमा बस्नका लागि तयार भएको उनले बताए ।
प्रगतिशील वैदेशिक रोजगार व्यवसायी मञ्च नेपालका तर्फबाट अध्यक्षको उम्मेदवार बन्ने तयारीमा रहेका पाण्डेले सोमबार संगठनको निर्णय बमोजिम प्रथम उपाध्यक्षमा उम्मेदवारी दर्ता गराएका थिए । प्रथम उपाध्यक्षमा अरु कसैको पनि उम्मेदवारी नपरेकाले उनी र्निविरोध निर्वाचित हुनेछन् । त्यसको घोषणा संघको साधारण सभामा गरिने छ ।
‘यसभन्दा अघिका चुनावहरूमा आफूसँग पराजित भएका व्यक्तिहरूलाई समेत सहमतिका लागि मैले छाडेँ,’ पाण्डेले भने । व्यवसायीको चुनावमा आङ्खनो प्रतिस्पर्धी कोही नभएको दाबी गरेका पाण्डेले संघको नेतृत्वमा गएर व्यवसायीको हक हितका लागि काम गर्न तयार रहेकोसमेत बताएका छन् । यसअघि उपाध्यक्ष भएको समयमा पनि व्यवसायीका पक्षमा काम गरेको भन्दै व्यवसायीका लागि दिन रात नभनी काम गर्ने उनले बताए ।
सर्वसम्मतिका नाममा टीका लगाएर संघको सदस्यसमेत नरहेकाहरू पदाधिकारीमा आउँदा व्यवसायीका पक्षमा काम केही असहज हुने पनि उनले बताएका छन् । वास्तविक व्यवसायीहरूलाई समेट्नका लागि पनि विभिन्न संगठनहरूले ध्यान दिनु पर्ने उनले बताए । ‘राजनीतिक पार्टीका रूपमा भागबन्डाबाट संघमा पुगे पनि व्यवसायीका कुरा हुन्छन्, राजनीतिको ‘र’ पनि हुन्न दिन्नँ,’ पाण्डेले भने ।
केही पदमा उम्मेदवारीसमेत परेको भन्दै उनीहरूले तोकेको समयमा नाम फिर्ता नलिए सम्बन्धित संगठनले कारबाही गर्नु पर्ने निर्णय भएकाले कारबाही गर्नु पर्नेसमेत उनले बताएका छन् ।
आफूले पहिले पनि सर्वसम्मतिका लागि बाधक नभएको बताएको र पछि हटेको उनले बताए । धेरै व्यवसायीले अध्यक्ष नछाड्नका लागि आग्रह गरेको भए पनि आफूले ऐतिहासिक रूपमा भएको यो निर्णयलाई शीरोधार्य गरेको उनले बताएका छन् ।
