काठमाडौं– नेपाल वैदेशिक रोजगार व्यवसायी संघका कार्यवाहक अध्यक्ष कमल तामाङले वैदेशिक रोजगार व्यवसायी स्कुसजस्तो भएको बताएका छन् । आइतबार पत्रकार भेटघाट कार्यक्रममा कार्यबाहक अध्यक्ष तामाङले वैदेशिक रोजगार सबैलाई काम लाग्ने तर राम्रो कसैले नभन्ने स्कुसजस्तै भएको बताए ।
कार्यबाहक अध्यक्ष तामाङले भने, ‘जरा, फल र मुन्टासमेत काम लाग्ने स्कुसलाई सबैले ‘ह्या स्कुस’ भनेजस्तै देशको आर्थिक मेरुदण्डको काम गर्नेदेखि लिएर व्यक्तिको घरको छाना फेर्ने व्यवसायलाई बद्नाम गर्ने काम मात्रै गरियो ।’ राम्रो भएको भए पनि वैदेशिक रोजगारीका कारण भएको हो भन्न कोही पनि तयार नभएको उनको गुनासो थियो । ‘सबैले दल, ठगको उपनाम मात्रै दिने गरेका छन् । तर त्यहिँबाट छोराछोरीलाई राम्रो विद्यालयमा पढाउनेदेखि श्रीमतीको चोलो फेर्ने कार्य गरिरहेको अवस्था छ,’ उनले भने ।
‘सरकारले पनि व्यवस्थित बनाउनेभन्दा पनि व्यवसायीलाई दुःख दिने कार्य मात्रै गरेको उनले गुनासो गरेका छन् । कुनै मःमः पसलेलाई दिनमा यतिको व्यापार गर्नै पर्छ भनेजस्तो वर्षमा १ सय जना पठाउनै पर्छ भन्ने कुरा कसरी व्यवहारिक हुन्छ ?’ तामाङले प्रश्न गरे । सरकारले जिटुजीमार्फत पठाउने देशमा लाखौँ रकम लिने र व्यवसायीलाई १० हजार सेवा शुल्क मात्रै लिन भन्ने कुरा पनि व्यवहारिक नभएको उनले बताएका छन् । आफू नेतृत्वमा आएपछि व्यवसायीका पक्षमा थोरै भए पनि काम गरेको उनले दाबी गरे ।
जिट्को खुला गर्नेदेखि लिएर म्याद सकिएको भिसाको समय थप्नेसम्मका कार्य गर्नका लागि सफल भएको उनले बताएका छन् । साथै संघको नेतृत्वसमेत सर्वसम्मत रूपमा चयन गर्नका लागि पहल गरिएको र सोहीअनुसार सफल भएको उनको बताए । पार्टीगत रूपमा चुनावबाट नेतृत्वमा जाँदा काम गर्न समस्या भइरहेकाले अहिले सर्वसम्मतिका लागि प्रयास गरिएको उनको दावी छ । साथै सरकारले व्यवसायीसँग धरौटी लिएको रकम फिर्ता पाउनु पर्ने माग भइरहेको उनले बताएका छन् । इराक घटनापछि व्यवसायीले रकम फिर्ता पाएको भन्दै यसपटक पनि धरौटी रकम एक वर्षका लागि चलाउन पाउने व्यवस्था गर्नु पर्ने उनले बताएका छन् । एक वर्षपछि संस्था नवीकरण गर्दा सरकारलाई सो रकम फिर्ता नगरेमा दर्ता खारेजी गर्नेसम्मको काम गर्दा हुने उनको भनाइ थियो । अहिले व्यवसायीहरू घरभाडासमेत तिर्न नसक्ने अवस्थामा पुगेको भन्दै धरौटी रकम प्रयोग गर्न पाएको खण्डमा व्यवसायीलाई राहत मिल्ने उनले बताए ।
तामाङले विदेशमा दक्ष श्रमिक पठाउनका लागि तालिमको आवश्यकता रहेकोसमेत बताएका छन् । त्यसका लागि प्रशिक्षण केन्द्र निर्माण गरेर दक्ष बनाउनु पर्ने उनले बताए । उनका अनुसार यस विषयमा सरकारसँग समन्वय भइरहेको भन्दै यस्तो कार्य गर्न सकेको खण्डमा सबै पक्षलाई फाइदा हुन्छ । भिजिट भिसाको विषयमा पनि व्यवसायीलाई नै दोष दिने गरिएको भन्दै कुनै व्यवसायीले भिजिट भिसामा पठाएको भए कारबाही गर्न संघले सहयोग गर्ने उनले बताएका छन् । यदि कुनै व्यवसायीले ठगेको प्रमाण दिएमा कारबाहीका लागि आपूmहरू तयार रहेकोसमेत उनले बताए । व्यवसायलाई मर्यादित बनाउन श्रमिक र व्यवसायी दुवै मर्यादित हुनु पर्ने उनले बताए ।
यसैबीच, वैदेशिक रोजगार बोर्डले उद्देश्यअनुसार काम गर्न नसकेको उनको आरोप लगाएका छन् । ‘व्यवसायको प्रवद्र्धन गर्ने भनेर खोलिएको बोर्डले खाली गोष्ठी गर्ने र भत्ता बाँड्ने काम मात्रै गरेको छ,’ कार्यबाहक अध्यक्ष तामाङले भने । व्यवसायलाई प्रवद्र्धन गर्नका लागि कुनै पनि कार्य नभएको र यस विषयमा आफूले बारम्बार आवाज उठाउको पनि उनले सुनाए । ‘म पनि बोर्डको सदस्य हुँ, होटलमा गरिने गोष्ठीले न त व्यवसायको प्रवद्र्धन हुन्छ न त श्रमिकको पक्षमा काम नै हुन्छ, मात्रै भत्ता खाने काम हुन्छ र भइरहेको छ,’ उनले भने । नेतृत्वको दाबीका विषयमा पत्रकारले सोधेको प्रश्नमा उनले घुमाउरो तरिकाले आफूले ९ महिनाको अवधिमा सकारात्मक काम गरेको भन्दै दुई वर्षको कार्यकाल चलाउन पाए व्यवसायलाई मर्यादित बनाउनेतर्फ आफ्नो जोड रहने उनले बताए ।
-1745656903.jpeg)