काठमाडौं– नेपाल वैदेशिक रोजगार व्यवसायी संघको अध्यक्षका लागि दुई जनाको उम्मेदवारी परेको छ । सोमबार उम्मेदवारी दर्ता गर्ने अन्तिम समयसम्म नेपाल लोकतान्त्रिक वैदेशिक रोजगार व्यवसायी संघका तर्फबाट भुवनसिहं गुरुङ र वैदेशिक रोजगार व्यवसायी गणतान्त्रिक मञ्चका पूर्वसंयोजक रामप्रसाद भन्तनाको उम्मेदवारी परेको हो ।
सर्वसम्मतिका लागि नेतृत्व चयन गर्ने सहमति भए पनि अध्यक्षमा दुई जानको उम्मेदवारी परेसँगै चुनाव हुने सम्भावना बढेको बताइएको छ । केही पदमा भने सर्वसम्मति भएको छ । अध्यक्षमा दुई जनाको उम्मेदावरी परे पनि प्रथम उपाध्यक्षमा भने सर्वसम्मत रूपमा हरिबहादुर पाण्डे क्षत्री चयन भएको संघका सचिव मेघनाथ भुर्तेले बताएका छन् । प्रथम उपाध्यक्ष प्रगतिशिल वैदेशिक रोजगार व्यवसायी मञ्च नेपालको भागमा परेको थियो र एक जानको मात्रै उम्मेदवारी परेकाले सर्वसम्मत भएको सचिव भुर्तेले बताए ।
त्यस्तै पदाधिकारीमा द्वितीय उपाध्यक्ष र महासचिब पनि एक÷एक जनाको मात्रै उम्मेदावरी परेको र उनीहरू सर्वसम्मत भएको भुर्तेलले बताएका छन् । पदाधिकारीमध्ये तृतीय उपाध्यक्ष, सचिव र कोषाध्यक्षमा भने दुई–दुई जनाको उम्मेदावरी परेको बताइएको छ । त्यसका अलावा १९ जनाले सदस्यमा उम्मेदवारी दिएको बताइएको छ । तृतीय उपाध्यक्षमा अख्तर हुसैन र कर्णराज कटुवालको उम्मेदवारी परेको छ । त्यस्तै सचिवमा प्रज्ञान न्यौपाने र केशवराज न्यौपानेको उम्मेदवारी परेको छ भने कोषाध्यक्षमा इन्दिरा गुरुङ र नरेन्द्रप्रसाद ढकालको उम्मेदवारी परेको छ ।
संघको सदस्यहरूमा अनिल बोगटी, गणेश कुँवर, कामेश्वर साह (राहुल), केदारनाथ अधिकारी, चन्द्रबहादुर लिम्बू र मिलन कट्टेलको उम्मेदवारी परेको छ । त्यस्तै सोमबहादुर तामाङ, मोहम्द जुनैद, जंगबहादुर इजम, राजेन्द्र अधिकारी, हर्कबहादुर लिम्बू, कैलाश पाठक, प्रेमराज लावती, प्रकाश बोहोरा, नरेन्द्रप्रसाद पोखरेल (नवीन), विक्रम श्रेष्ठ, लक्ष्मण पौडेल, विजयकुमार कार्की र ऋषिराम कँडेलको उम्मेदवारी परेको निर्वाचन समितिले जनाएको छ ।
उम्मेदवारी मनोनयन गर्ने समयमा केही पदमा धेरैको उम्मेदवारी परे पनि दाबी विरोधको समयमा नाम फिर्ता हुने र सर्वसम्मतिमा नै नेतृत्व चयन हुने संघका सचिव भुर्तेले बताएका छन् । उम्मेदवारी परेपछि नै सर्वसम्मतिको कुरा हुने सहमतिमै नेतृत्व चयन हुने उनले बताए । यस्तै नेपाल लोकतान्त्रिक वैदेशिक रोजगार व्यवसायी एसोसिएसनका अध्यक्ष नरेन्द्रप्रसाद ढकालले धेरैको उम्मेदवारी परे पनि सहमति हुने बताएका छन् । उम्मेदावर बन्नका लागि पाइने भए पनि सर्वसम्मतिका लागि भएको प्रयासविपरीतको उम्मेदवारलाई सम्बन्धित संगठनले नै कारबाही गर्ने बताए ।
यता, अध्यक्षका उम्मेदवार रामप्रसाद भन्तनाले भने चुनाव हुने ठोकुवा गरेका छन् । अध्यक्षमा मनोनयन दर्ता पछि प्रभाव दैनिकसँग कुरा गर्दै उनले भने, ‘राजनीतिक रूपमा भागबन्डा गर्दा बास्तविक व्यवसायीहरू असन्तुष्ट भएको अवस्था छ, सर्वसम्मतिका लागि प्रयास हुने तर सहमति हुने सम्भावना न्यून छ ।’ उम्मेदवारी दिइसकेको अवस्थामा छलफल हुने भए पनि सहमतिको सम्भावना नरहेको र चुनाव नै हुने उनले बताए ।
व्यवसायमा पार्टीलाई जोड्न नहुने भन्दै पार्टीगत रूपमा भन्दा पनि व्यवसायिक रूपमा मिलेर जानु पर्ने आङ्खनो धारणा रहेको उनले बताएका छन् । ‘राजनीतिक रूपमा भएको भागबन्डाको विरुद्धमा मेरो उम्मेदवारी हो, चुनाव हुन्छ, अन्य पदमा पनि संख्याभन्दा धेरैको उम्मेदवारी परेको छ,’ भन्तनाले भने ।
