काठमाडौं– नेपाल वैदेशिक रोजगार व्यवसायी संघको नेतृत्व ऐतिहासिक रूपमा सर्वसम्मत रूपमा चयन हुने भएको छ । अहिलेसम्म चुनावी प्रतिस्पर्धाबाट छनोट हुँदै आएको संघको नेतृत्व यसपटक सर्वसम्मत रूपमा चयन हुने भएको हो । सर्वसम्मत गर्नका लागि गठन गरिएको कार्यदलको शुक्रबारको बैठकले सर्वसम्मतिका लागि सहमति गरेसँगै संघमा ऐतिहासिक रूपमा सबैको प्रतिनिधित्वसहितको कार्यसमिति आउने भएको हो ।
संघका कार्यवाहक अध्यक्ष कमल तामाङको संयोजकत्वमा गठन गरेको कार्यदलले विभिन्न ५ राजनीतिक दलनिकट व्यावसायीहरूको प्रतिनिधित्व हुने गरी सहमति गरेको प्रगतिशिल वैदेशिक रोजगार व्यवसायी मञ्च नेपालका कार्यवाहक अध्यक्ष राजेन्द्र भण्डारीले बताएका छन् । निरन्तरको प्रयासपछि सहमति भएको र कुन संगठनले कुन पद पाउने भन्ने विषयमा पनि सहमति भएको भण्डारीले बताए । भण्डारीका अनुसार कांग्रेसनिकट नेपाल लोकतान्त्रिक वैदेशिक रोजगार व्यावसायी एसोसिएसनले अध्यक्ष, सचिव र कोषाध्यक्षसहित ५ सदस्य पाउने, प्रगतिशिल मञ्चले प्रथम उपाध्यक्षसहित ३ जना सदस्य पाउने छ ।
त्यस्तै, नेकपा माओवादीनिकट वैदेशिक रोजगार व्यवसायी गणतान्त्रिक मञ्चले द्वितीय उपाध्यक्ष र दुई सदस्य, नेकपा एकीकृत समाजवादीनिकट एकीकृत वैदेशिक रोजगार व्यवसायी संगठनले महासचिव र तीन सदस्य तथा जनता समाजवादीनिकट समाजवादी वैदेशिक रोजगार व्यवसायी संघले तृतीय उपाध्यक्ष र एक सदस्य पाउने गरी सहमति भएको बताइएको छ । कोरोना महामारीका कारण व्यावसाय शिथिल भएको अवस्थामा सर्वसम्मतिमा नेतृत्व चयनका लागि सुरुदेखि नै छलफल भइरहेको थियो । शुक्रबारको छलफलबाट सहमति भएको र ३० पुसमा आयोजना हुने संघको २९औँ साधारण सभाबाट सर्वसम्मत रूपमा ऐतिहासिक नेतृत्व चयन गर्ने छ ।
संघमा सदस्य संख्याको आधारमा प्रतिनित्व गराउने विषयमा छलफल भएको बताइएको छ । नेपाल लोकतान्त्रिक वैदेशिक रोजगार व्यवसायी एसोसिएसनको भागमा परेका पदको आइतबार मात्रै टुंगो लाग्ने अध्यक्ष नरेन्द्र ढकालले बताएका छन् । कसलाई पठाउने भन्ने विषयमा छलफल भइरहेको र निष्कर्ष निस्कन नसकेको उनले बताए । यता मञ्चले उम्मेदवारको नाम टुंग्याएको बताएको छ । मञ्चका महासचिव कुमार केसीका अनुसार नाम टुंग्याइएको र आइतबार उम्मेदवारी दर्तापछि मात्रै सार्वजनिक गरिनेछ । त्यस्तै अन्य संगठनले पनि आइतबार नै उम्मेदावरहरूका विषयमा जानकारी गराउने बताएका छन् ।
-1745656903.jpeg)