काठमाडौं– नेपाल वैदेशिक रोजगार व्यवसायी संघ नेतृत्व सर्वसम्मत रूपमा चयन गर्ने जिम्मा पाएको कार्यदलको बिहीबारको बैठकले कुनै सहमति निकाल्न नसकेको बताइएको छ । बुधबार दुई दिनको सयम पाएर गठन गरिएको कार्यदलको बैठक बसे पनि कुनै सहमति हुन नसकेको संघका सचिव मेघनाथ भुर्तेलले बताए ।
‘छलफल सकारात्मक भए पनि आजको बैठकमा कुनै सहमति हुन सकेन, भोलि फेरि बैठक बस्छ,’ सचिव भुर्तेलले भने । बिहीबारको छलफलमा सबै राजनीति दलनिकट व्यवसायीहरू मिलेर जानु पर्नेमा व्यवसायीको जोड रहेको उनले बताएका छन् । बुधबार संघका कार्यवाहक अध्यक्ष कमल तामाङको संयोजकत्वमा सबै राजनीति दलनिकट व्यवसायीका प्रमुख तथा प्रतिनिधिहरू र पूर्वअध्यक्षहरू सहितको कार्यदल निर्माण गरिएको थियो ।
५ वटा राजनीति दलनिकट व्यवसायीहरूलाई सदस्य संख्याका आधारमा पद भागबन्डा गर्ने विषयमा छलफल भएको र शुक्रबारको बैठकबाट के निर्णय हुन्छ त्यसपछि मात्रै भन्न सकिने सचिव भुर्तेलले बताएका छन् । सबैभन्दा धेरै सदस्य संख्या भएको संगठनलाई अध्यक्ष दुई पदाधिकारी र ५ सदस्य दिने त्यसपछि क्रमशः अरु पदहरूमा पनि सोहीअनुसार सहमतिको लागि प्रयास गरिने बताइएको छ ।
संघको चुनावसहितको साधारण सभा ३० पुसमा आयोजना हुँदै छ । यो साधारण सभाले २ वर्षका लागि नयाँ नेतृत्वसमेत चयन गर्ने छ । यो पटक कोभिडलगायत समस्याले गर्दा चुनावभन्दा पनि सर्वसम्मत रूपमा नेतृत्व चयन गर्नु पर्ने व्यवसायीहरूको भावनाअनुसार छलफल भइरहेको बताइएको छ ।
