काठमाडौं– श्रम, रोजगार तथा सामाजिक सुरक्षामन्त्री कृष्णकुमार श्रेष्ठले नेपाली युवाका लागि फ्रान्समा रोजगारीका अवसर प्रदान गर्नका लागि आग्रह गरेका छन् । मन्त्री श्रेष्ठले मंगलबार मन्त्रालयमा नेपालका लागि फ्रान्सका राजदूत गिल्स बुर्बाओसँगको भेटका क्रममा यस्तो आग्रह गरेका हुन् ।
राजदूत र मन्त्रीबीच शिष्टाचार भेटघाट भएको बताइएको छ । सो अवसरमा मन्त्रीले रोजगारी अवसर दिन अुनरोध गरेको बताइएको छ । नेपाल–फ्रान्सबीच रहिआएको आपसीसम्बन्ध आगामी दिनमा अझ विस्तार हुने विश्वास व्यक्त गर्दै मन्त्री श्रेष्ठले फ्रान्सले नेपाललाई उपलब्ध गराउँदै आएको आर्थिक एवं सामाजिक क्षेत्रको सहयोग निरन्तर हुने विश्वाससमेत व्यक्त गरेको जनाइएको छ ।
सो अवसरमा राजदूत बुर्बाओले नेपाली स्वास्थ्यकर्मीका लागि फ्रान्सको स्वास्थ्य क्षेत्रमा रोजगारी अवसर सिर्जना हुन सक्ने बताएको जनाइएको छ । साथै कोभिड–१९ महामारीपछि फ्रान्सको पर्यटन उद्योगमा पनि नेपाली श्रमिकका लागि रोजगारी सिर्जना हुने देखिएको मन्त्री श्रेष्ठको निजी सचिवालयले जनाएको छ । राजदूत बुर्बाओले फ्रान्समा रोजगारीका लागि जान भाषा तथा व्यावसायिक तालिमको राम्रो प्रबन्ध हुनुपर्नेमा जोड दिएको बताइएको छ । राजदूतका अनुसार फ्रान्समा फ्रान्सेली नागरिकसरह नै विदेशी श्रमिकले पनि पारिश्रमिक तथा सामाजिक सुरक्षाको सुविधा उपभोग गर्न पाउनेछन् ।
-1752335779.jpg)
