काठमाडौं– नेपाल वैदेशिक रोजगार व्यवसायी संघको आगामी नेतृत्व सर्वसम्मत रूपमा चयन गर्नका लागि कार्यदल गठन गरिएको छ । बुधबार संघको कार्यालयमा भएको सर्वपक्षीय बैठकले संघका कार्यबाहक अध्यक्ष कमल तामाङको नेतृत्वमा १३ सदस्यीय समिति गठन गरेको हो ।
समितिमा संघका ६ जना पूर्वअध्यक्ष, विभिन्न राजनीतिक दलनिकट व्यवसायी संगठनका प्रतिनिधि र संघका तर्फबाट सचिव र कार्यवाहक अध्यक्ष रहेका छन् । तामाङको संयोजकत्वमा रहेको समितिमा पूर्वअध्यक्षहरू तिलक रानाभाट, बलबहादुर तामाङ, विमल ढकाल, प्रेमबहादुर कटुवाल, दिलप्रसाद पोखरेल र रोहन गुरुङ रहेका छन् । त्यस्तै नेपाली कांग्रेसनिकट लोकतान्त्रिक वैदेशिक रोजगार व्यवसायी एसोसिएसनका अध्यक्ष नरेन्द्र ढकाल, एमालेनिकट प्रगतिशिल वैदेशिक रोजगार व्यवसायी मञ्च नेपालका कार्यवाहक अध्यक्ष राजेन्द्र भण्डारी, नेकपा माओवादी केन्द्रनिकट गणतान्त्रिक मञ्चका अध्यक्ष रामप्रसाद भन्तना, नेकपा एकीकृत समाजवादीनिकट व्यवसायी संगठन एकीकृत वैदेशिक रोजगार व्यवसायी संगठनबाट सन्तकुमार लामा र तराई मधेस लोकतान्त्रिक वैदेशिक रोजगार व्यवसायीका तर्फबाट अख्तर हुसेन रहेको बताइएको छ । त्यस्तै संघबाट कार्यवाहक अध्यक्ष तामाङसँगै सचिव मेघनाथ भुर्तेल रहेका छन् ।
सर्वसम्मत नेतृत्वका लागि कार्यदल गठन भएसँगै साझा नेतृत्व आउने बाटो खुलेको मञ्चका कार्यबाह अध्यक्ष भण्डारीले बताएका छन् । सबै व्यवसायीको चाहनाअनुसार नै सर्वसम्मत नेतृत्व चयन गरेर सकारात्मक सन्देश दिनुपर्ने यो अवस्थामा सकारात्मक पहल भएको उनले बताए । व्यवसायीको हक हितमा काम गर्नेका लागि ऐतिहासिक रूपमा सहमति गर्नु पर्ने आवश्यकताअनुसार अगाडि बढिएको कार्यवाहक अध्यक्ष तामाङले बताएका छन् । ‘कोभिड–१९ ले थिलोथिलो बनाएको व्यावसायलाई अगाडि बढाउनका लागि पनि अहिले यो आवश्यकता रहेको र सोहीअनुसार कार्यदल निर्माण गरिएको हो,’ उनले भने । कार्यदल बनाएर व्यवसायीहरू एक भएर अगाडि बढेको संन्देश प्रभाव भएको भन्दै नेतृत्वसमेत सर्वसम्मत गर्न सकेमा सबैमा सकारात्मक सन्देश जाने उनले बताए ।
राजनीतिक आस्थाका आधारमा भन्दा पनि व्यवसायीको हक हितका लागि सबै मिल्नुको विकल्प नरहेको संघका सचिव भुर्तेले बताएका छन् । आफूले सुरुदेखि नै सहमतिमा नेतृत्व चयन गर्नु पर्छ भनेको र पहल पनि गर्दै आएको उनले सुनाए । ‘राजनीतिक आस्थाका आधारमा प्रतिनिधित्व हुँदा व्यवसायीका मुद्दाहरू ओझेलमा पर्ने गरेको छ, व्यवसायीको हक हितका लागि पनि सर्वसम्मत रूपमा नेतृत्व चयन गर्नुपर्छ,’ सचिव भुर्तेलले भने ।
