काठमाडौं– नेपाल वैदेशिक रोजगार व्यवसायी संघको आगामी नेतृत्व सर्वसम्मत रूपमा चयन गर्नका लागि बुधबार सर्वपक्षीय बैठकको आयोजना गरिने भएको छ । सबै व्यवसायीको चाहनाअनुसार सर्वसम्मत नेतृत्व चयन गर्नका लागि सबै दलनिकट व्यवसायीहरूलाई बोलाएर छलफल गर्न लागिएको हो ।
साझा नेतृत्व चयन गर्नुपर्ने व्यवसायीको चाहनाअनुसार नै अगाडि बढ्नु पर्ने आवाजहरू आइरहेको अवस्थामा सबैसँगको छलफलका लागि बैठकको आयोजना गरिएको संघका कार्यबाहक अध्यक्ष कमल तामाङले बताएका छन् । अहिलेसम्म यसरी सबै संगठनसँग छलफल नभएको र यसले सकारात्मक परिणाम निकाल्ने आसा गरिएको कार्यबाहक अध्यक्ष तामाङले बताए । ‘आवाज उठिरहेको अवस्थामा किन आफैँबाट सूरुवात नगर्ने त भन्ने हिसाबबाट बैठक आयोजना गरिएको हो,’ उनले भने ।
व्यवसायीको यावत् समस्या समाधानका लागि एक कदम पछाडि हट्न तयार हुनु परे पनि हट्न तयार हुने गरी लचिलो हुनु पर्ने अवस्था रहेको कार्यबाहक अध्यक्ष तामाङले बताएका छन् । त्यसका लागि तयार भएरै यो बैठकको आयोजना गरिएको उनले बताए । तामाङका अनुसार साझा रूपमा सबै व्यवसायिक संगठनका व्यक्तिहरू समावेश गरेर जाँदा सरकारसँग कुरा गर्नसमेत सहज हुनेछ । संघले सर्वसम्मतिका लागि सर्वपक्षीय बैठकको आयोजना गरेकाले आफूहरूले मंगलबार गर्ने भनिएको उम्मेदवारी घोषणाको कार्यक्रमसमेत रोकिएको नेपाल लोकतान्त्रिक वैदेशिक रोजगार व्यवसायी एसोसिएसनका अध्यक्ष नरेन्द्र ढकालले बताएका छन् । ‘बुधबार दिउँसो २ बजेका लागि संघमा सर्वपक्षीय बैठक बोलाइको छ, यो छलफलबाट कुनै निष्कर्ष निस्कन सकेन भने मात्र उम्मेदवारी घोषणा गछौँ,’ अध्यक्ष ढकालले भने ।
कोरोनाले अस्तव्यत बनाएको व्यवसायलाई चलायमान बनाउनका लागि पनि एसोसिएसनको तर्फबाट सर्वसम्मत नेतृत्व चयनका अन्तिम प्रयास स्वरूप यो बैठकलाई लिइएको अध्यक्ष ढकालले बताएका छन् । अहिलेसम्म सबै संगठनसँग छलफल भए पनि आकांक्षी धेरै र पद थोरै हुँदा समस्या भएको पनि अध्यक्ष ढकालले बताए । यो चुनावमा सबैको मुद्दा भनेको फ्रि भिसा फ्रि टिकट, १ सय जना श्रमिक पठाउनै पर्ने विषयलगायत रहेका छन् । सबैको मुद्दा एकै किसिमका भए पनि नेतृत्वका लागि भने अहिलेसम्म ठोस सहमति बन्न नसकेको बताइएको छ । सबै संगठनसँग २–३ चरणको वार्ता भए पनि परिणाम आउन नसकेको एसोसिएसनका अध्यक्ष ढकालले बताएका छन् ।
यता प्रमुख प्रतिपक्ष दल नेकपा एमालेनिकट व्यवसायी संगठन प्रगतिशील वैदेशिक रोजगार मञ्च नेपालका कार्यबाहक अध्यक्ष राजेन्द्र भण्डारीले पनि प्रयास भएको र सफलता प्राप्त नभएको बताएका छन् । यता मञ्चका महासचिव कुमार केसीले अब चुनाव हुने र सर्वसम्मतिको सम्भावना सकिँदै गएको बताएका छन् । व्यवसायीको हक हितका लागि सर्वसम्मत नेतृत्व चयन गर्दा सहज हुने भए पनि त्यो सम्भव नहुने देखिएको उनले बताए । व्यवसायीहरूले संघको साधारण सभाको मिति घोषणा भएदेखि नै सर्वसम्मतिको प्रयास गर्ने भन्दै आए पनि त्यो सम्भावना टर्दै गएको व्यवसायीहरूले नै बताइसकेका छन् ।
