काठमाडौं– प्रगतिशील वैदेशिक रोजगार ब्याबसायी मञ्च नेपाल आगामी ३० पुसमा हुने नेपाल वैदेशिक रोजगार व्यवसायी संघको चुनावका लागि सहमतिका लागि शनिबारम्म मात्रै पर्खिने बताएका छ । मञ्चका कार्यवाहक अध्यक्ष राजेन्द्र भण्डारीले अहिले सबै पक्षसँग कुरा भइरहेको र शनिबारसम्म सर्वसम्मतका लागि प्रयास गरिने र त्यसपछि मञ्चको तर्फबाट उम्मेदवारी घोषणा हुने बताए ।
‘सबै पक्षसँग छलफल भइरहेको छ, सहमति बन्न सकेको छैन, शनिबारसम्म प्रयास हुन्छ, आइतबार मञ्चले उम्मेदवारी घोषणा गर्छ,’ भण्डारीले भने । मञ्चले उम्मेदवारी घोषणा गर्दा एकल गर्ने वा गठबन्ध बनाएर अगाडि बढ्ने भन्ने विषयमा पनि उम्मेदवारी गर्दाखेरी नै जानकारी दिने उनले बताएका छन् । सबै व्यवसायी एक भएर जानु पर्छ भन्ने आवाज उठिरहेको र सोहीअनुसार नै छलफलसमेत भइरहेको भण्डारीले बताए ।
अहिलेको अवस्थामा सबै मिलेर जाँदा सबैमा सकारात्मक सन्देश प्रवाह हुने र त्यसबाट व्यावसायीका पक्षमा काम गर्न सहज हुने व्यवसायीहरूले बताउँदै आएका छन् । अहिले सबै व्यवसायीहरू ध्रुवीकृत भएर जानु पर्ने अवस्था रहेको र त्यसका लागि पहल भइरहेको पनि कार्यबाहक अध्यक्ष भण्डारीले बताएका छन् ।
प्रतिनिधि पठाउन आग्रह
यसैबीच, आसन्न चुनावका लागि म्यानपावर व्यवसायीलाई प्रतिनिधिको नाम पठाउनका लागि व्यवसायीका संगठनहरूले आग्रह गरेका छन् । नेपाल वैदेशिक रोजगार व्यवसायी संघले तोकेको समयमा प्रतिनिधिको नामावली उपलब्ध गराउन उनीहरूले आफ्ना सदस्यहरूलाई आग्रह गरेका हुन् ।
प्रगतिशील वैदेशिक रोजगार ब्याबसायी मञ्च नेपालका कार्यवाहक अध्यक्ष भण्डारीले संघको २९औँ साधारण सभाले नेतृत्वसमेत चयन गर्ने भएकाले समय मै प्रतिनिधिको नाम संघमा उपलब्ध गराउन आग्रह गरेका छन् । यस्तै नेपाल लोकतान्त्रिक वैदेशिक रोजगार ब्यवसायी एसोसिएसनले पनि एसोसिएसनसँग आबद्ध व्यवसायीलाई नामावाली उपलब्ध गराउनका लागि आग्रह गरेको छ । एसोसिएनका अध्यक्ष नरेन्द्र ढकालले सामाजिक सञ्जाल फेसबुकमा लेख्दै समय मै प्रतिनिधिको नाम उपलब्ध गराउन आग्रह गरेका छन् ।
प्रतिनिधि पठाउँदा संस्थाको लेटरहेडमा प्रतिनिधिको नामसहितको निवेदन, सेयर लागतको प्रतिलिपि, इजाजत पत्रको प्रतिलिपि, नागरिकताको प्रतिलिपि, पासपोर्ट साइजको दुई प्रति फोटो र संघलाई तिर्नु पर्ने लेबी तिरेको प्रमाणसहित संघमा जानकारी पठाउनु पर्ने बताइएको छ ।
-1745656903.jpeg)