काठमाडौं– नेपाल वैदेशिक रोजगार व्यवसायी संघको चुनाव नजिकिएसँगै नेतृत्व चयनका लागि सर्वसम्मत रूपमा अगाडि बढ्नु पर्ने आवाज उठ्न थालेको छ । सत्तारुढ दल नेपाली कांग्रेस र प्रमुख प्रतिपक्ष दल नेकपा एमालेनिकट व्यवसायीहरूले संघको नेतृत्व चयनमा सहमतिको प्रयास गर्ने बताएका हुन् ।
३० पुसमा आयोजना हुने संघको साधारण सभाले सर्वसम्मत रूपमा नेतृत्व चयन गर्नका लागि पहल गर्नु पर्ने नेपाल लोकतान्त्रिक वैदेशिक रोजगार व्यवसायी एसोसिएनका अध्यक्ष नरेन्द्र ढकाले बताएका छन् । प्रभाव दैनिकसँग कुरा गर्दै अध्यक्ष ढकालले अहिलेको विषम परिथितिमा सबै मिलेर जानु पर्ने बताएका हुन् । कोभिड–१९ ले व्यवसायमा ठूलो असर पारेको अवस्थामा व्यवसायीहरू नै विभाजित हुने अवस्था आउन नहुने उनले बताए ।
अध्यक्ष ढकालका अनुसार अहिले संघको नेतृत्वका लागि एसोसिएनमा धेरै जनाले दाबी गरिरहेको भए पनि सुरुवाती चरणमा सहमतिका लागि पहल गर्ने र सफल हुन नसकेमा मात्रै लाकतान्त्रिक पक्रिया अवलम्बन गर्ने गरी एसोसिएसन अगाडि बढेको छ । ‘कोभिड–१९ का कारण सबै मिलेर जानु पर्ने अवस्था देखिएको छ, सोहीबमोजिम एसोसिएनले पहल गर्ने र सफल नभए स्वभाविक रूपमा लोकतान्त्रिक प्रक्रिया अवलम्बन हुन्छ,’ अध्यक्ष ढकालले भने । एसोसिएनमा अहिलेको अवस्थामा ४ जनाले अध्यक्षमा दाबी गरिरहेको पनि ढकालले बताए । अहिले सबै पक्षसँग छलफल भइरहेको र छलफलबाट सहमति नभएको खण्डमा मात्रै उम्मेदवार घोषणा गरिने अध्यक्ष ढकालले बताएका छन् ।
यता प्रमुख प्रतिपक्ष दल नेकपा एमालेनिकट व्यवसायीहरूको संगठन प्रगतिशील वैदेशिक रोजगार व्यवसायी मञ्चका कार्यवाहक अध्यक्ष राजेन्द्र भण्डारीले पनि सहमतिका लागि प्रयास भइरहेको बताएका छन् । विषम परिस्थितिमा सहमतिका साथ जाँदा सबै व्यावसायीमा सकारात्मक सन्देश जाने भन्दै मञ्चले सर्वसम्मत नेतृत्व चयन गर्ने निर्णय गरेको बताए । ‘सबै व्यवसायीहरू मिलेर जाने विषयमा पहल भइरहेको छ, त्यो सफल हुन नसकेको खण्डमा मात्रै चुनाव हुन्छ,’ कार्यवाहक अध्यक्ष भण्डारीले भने । कोरोनाले समस्यामा पारेको व्यवसाय र व्यवसायीका पक्षमा काम गर्नका लागि पनि सर्वसम्मत नेतृत्वका लागि पहल गर्नु पर्ने उनले बताए । ‘अहिलेको परिस्थितिले पनि सबै मिल्नुको विकल्प नरहेको देखाएकोे छ । अहिले सर्वसम्मतका लागि प्रयास भइरहेको छ, सर्वसम्मत हुन नसेकमा प्रगतिशिल मञ्च टिम बनाएर अगाडि बढ्छ,’ उनले भने ।
राजनीतिक आस्था फरक भए पनि विपत्को समयमा व्यावसायीहरू एक जुट भएर अगाडि बढ्नु पर्ने व्यवसायी संगठनले जनाएका छन् । राजनीतिभन्दा माथि उठेर व्यावसायीका पक्षमा काम गर्नका लागि सबै मिलेर जाँदा सहज हुने बताइएको छ । मञ्चका तर्फबाट अहिले ३ जनाले अध्यक्षमा दाबी गरिरहेको भण्डारीले बताए ।
यसैबीच, नेपाल वैदेशिक रोजगार व्यवसायी संघका सचिव मेघनाथ भुर्तेलले पनि केही दिनअघिको कुराकानीमा सबै मिलेर अगाडि बढ्नु पर्ने बताएका थिए । संघमा दुई कार्यकाल काम गर्दाको आफ्नो अनुभवले पनि व्यवसायीहरूको हक हितका लागि सबै मिलेर जानु पर्ने बताएका हुन् । सचिव भुर्तेलले भने, ‘सबै पार्टीका व्यवसायीहरू रहेको र उनीहरूले अपनत्व महसुस गर्ने गरी नेतृत्व चयन गर्नेतर्फ लाग्नु पर्छ । व्यवसायीहरू पनि सुध्रिए छन्, राजनीतिकरण नगरी व्यावसायी हितका लागि नेतृत्व गर्न आए भन्ने सन्देश दिनका लागि आफूले भेटेका व्यवसायीहरूसित सर्वसम्मत नेतृत्व चयनका लागि आग्रह गरेको छु,’ उनले भने । राजनीति मत विभाजनका आधारमा नेतृत्वमा परीक्षण भइसकेकाहरूलाई राज्यले गर्ने व्यवहारका कारण पनि सर्वसम्मत रूपमा नेतृत्व चयन गरेर सकारात्मक सन्देश दिनु पर्ने उनले बताएका छन् । कोभिडलगायत विभिन्न कारण समस्यामा रहेको यो क्षेत्रलाई चलायमान बनाउन पनि यो विकल्पको आवश्यकता रहेको उनले दाबी गरे ।
-1752335779.jpg)
