काठमाडौं– प्रधानमन्त्री शेरबहादुर देवउवाले वैदेशिक रोजगारीका क्षेत्रमा देखिएका समस्या समाधानका लागि सम्बन्धित मन्त्रीहरूसँग छलफल गरेर समस्या समाधानका लागि पहल गर्ने आश्वासन दिएका छन् । मंगलबार नेपालीका कांग्रेसको सभापति विजयी भएको उपलक्ष्यमा नेपाल लोकतान्त्रिक वैदेशिक रोजगार व्यवसायी एसोसिएसनको तर्फबाट बधाई दिन गएको टोलीसँग प्रधानमन्त्री देउवाले यस्तो आश्वासन दिएका हुन् ।
एसासियसनको टोलीले वैदेशिक रोजगारीका लागि विदेश पठाउँदा कम्तीमा एक महिनाको तबल सुविधा सेवा शुल्कबापत लिन पाउनु पर्ने, कोभिडका कारण समस्यामा परेका व्यवसायीलाई धरौटी रकम केही समयका लागि फिर्ता गराउनका लागि आवश्यक पहल गरिदिन आग्रह गरेका थिए । भारत, बंगलादेशलगायत सार्कका अन्य देशमा शुल्कबापत एक महिनाको तलब लिएर श्रमिक पठाउने गरेको उदाहरण दिँदै नेपालमा पनि त्यस्तो व्यवस्था गर्न आग्रह गरिएको एसोसिएनका अध्यक्ष नरेन्द्र ढकालले बताएका छन् ।
अहिलेको फ्रि भिसा फ्रि टिकटको व्यवस्थाले राज्यलाई राजस्व तिर्न पनि नपाइएको अवस्थामा राजस्व तिर्ने वातावरण मिलाइदिन आग्रह गरिएको अध्यक्ष ढकालले बताए । ‘एक महिनाको तलब सेवा शुल्कबापत लिन पाउने व्यवस्था गर्दा जाने व्यक्ति पनि खुसी हुने र व्यवसायीले सरकारलाई ट्याक्स तिर्ने हुँदा सबैलाई फाइदा हुन्छ,’ अध्यक्ष ढकालले भने । सरकारले कोरिया इजरायलमा रोजगारीका लागि पठाउँदा डिल गर्न नसकेको तर सस्तो लोकप्रियताका लागि निर्णय गरिएकाले यस्तो अवस्था आएको व्यवसायीहरूले बताएका छन् । यस्तो अवस्थामा सरकारले व्यवसायलाई चलायमान बनाउनका लागि पनि पहल गरिदिन एसोसिएनको टोलीले आग्रह गरेको थियो ।
साथै एसोसिएसनको टोलीले इराक घटना हुँदाको सयममा व्यवसायीले राखेको धरौटी एक वर्षका लागि प्रयोग गर्न पाएको भन्दै अहिलेको अवस्थामा पनि व्यवसायीले राखेको ५० लाख नगद पैसा फिर्ता पाउने व्यवस्था गरिदिन आग्रह पनि गरेका छन् । ‘५० लाखमध्ये कम्तिमा २५ लाख रूपैयाँ मात्रै भए पनि व्यवसायीले एक वर्षका लागि प्रयोग गर्न पाउने व्यवस्था गरिदिन अनुरोध गरौँ,’ अध्यक्ष ढकालले भने ।
व्यवसायीका कुरा सुनिसकेपछि प्रधानमन्त्री देउवाले यसमा आफू सकारात्मक रहेको प्रतिक्रिया दिएका छन् । यी विषयमा प्रधानमन्त्री देउवाले अर्थमन्त्री, परराष्ट्रमन्त्री, श्रममन्त्रीलगायत सरोकारवालाबीच छलफल गरी समस्याहरू समाधान गर्ने आश्वासन दिए । सो अवसरमा कांग्रेसको सहमहामन्त्रीमा विजयी भएका भीष्मराज आङ्देम्बेलाई पनि व्यवसायीका समस्या समाधानका लागि पहल गरिदिन आग्रह गरिएको छ ।
प्रधानमन्त्रीलाई मौखिक रूपमा जानकारी दिइएको र लिखित रूपमा पनि एसोसिएसनले माग राख्ने भन्दै यसका लागि सहमहामन्त्रीका तर्फबाट पनि पहल गरिदिन एसोसिएनको टोलीले अनुरोध गरेको अध्यक्ष ढकालले बताए । एसोसिएसनको नेतृत्वमा गरेको टोलीमा एसोसिएसनमा आबद्ध नवनिर्वाचित केन्द्रीय सदस्य तथा महाधिवेशन प्रतिनिधिहरूको उपस्थिति रहेको अध्यक्ष ढकालले बताएका छन् ।
-1752335779.jpg)
