काठमाडौं– नेपाल प्रहरीले ७ देशमा प्रहरी सहचारी (कन्सुलर) राख्न गृहमन्त्राललाई प्रस्ताव गरेको छ । शनिबार प्रहरी प्रधान कार्यालयमा आयोजित पत्रकार सम्मेलनमा प्रहरी कन्सुलर राख्ने प्रस्ताव गरिएको नेपाल प्रहरीका प्रवक्ता वसन्तबहादुर कुँवरले बताएका हुन् ।
प्रवक्ता कुँवरका अनुसार प्रधान कार्यालयका तर्फबाट ७ वटा देशमा प्रहरी कन्सुलर राख्नका लागि गृहमन्त्रालयमा प्रस्ताव पठाइएको छ । लामो समयदेखि प्रहरी कन्सुलर राख्ने प्रस्ताव गरिएको भए पनि हालसम्म यसमा निर्णय हुन नसकेको भन्दै यसपटक स्वीकृत हुनेमा आसावादी रहेको प्रवक्ता कुँवरले बताए । हाल भारतस्थित नेपाली दूतावासमा मात्रै प्रहरी कन्सुलर रहेको पनि कार्यक्रममा जानकारी दिइएको थियो । भारतमा प्रहरी कन्सुलरको रूपमा प्रहरी वरिष्ठ उपरीक्षक वीरेन्द्र बस्याल कार्यरत रहेको बताइएको छ ।
शान्ति, सुरक्षा र आपराधिक विषय जोडिएका मामिलामा विभिन्न देशका सुरक्षा निकायसँग समन्वय गर्न प्रहरी कन्सुलर राख्नु अतिआवश्यक रहेको प्रवक्ता कुँवरले बताएका छन् । कुँवरका अनुसार हाल नेपालीको प्रमुख श्रम गन्तव्य मुलुकहरू संयुक्त अरब इमिरेट्स (युएई), कतार, साउदी अरेबिया र मलेसियासहित अमेरिका, बंगलादेश र चीनमा समेत प्रहरी कन्सुलर राख्न प्रस्ताव गरिएको छ । श्रम गन्तव्य मुलुकमा रहेका नागरिक समस्यामा परिरहेको र अमेरिकामा न्युयोर्कस्थित संयुक्त राष्ट्रसंघीय डिपमार्टमेन्ट अफ पिस किपिङ अपरेन्सस (डिपिकेओ) का लागि शान्ति मिसनमा जाने सुरक्षाकर्मीलाई लक्षित गरेर प्रहरी कन्सुलर आवश्यक रहेको बताइएको छ ।
त्यस्तै पछिल्लो समय चीन र बंगलादेशमा अध्ययन र व्यापारका लागि जाने नेपालीको संख्या बढिरहेकाले कन्सुलर राख्नु पर्ने आवश्यकाता देखिएको प्रहरीले जनाएको छ । ती देशहरूमा नेपाली विभिन्न मुद्दामा पेस गर्ने गरेको र त्यस्ता समस्या समाधानका लागि प्रहरी कन्सुलर आवश्यक रहेको प्रवक्ता कुँवरले बताएका छन् ।
