दोहा– वैदेशिक रोजगारीका लागि साउदी अरेबिया पुगेका बुटवलका दामोदर क्षत्रीलाई साउदीका लागि नेपाली कार्यबाहक राजदूत दिलिप पौडेलले भेटेका छन् । ११ वर्षदेखि २५ लाख क्षतिपूर्ति तिर्न नसकेर साउदीमा बिचल्ली परेका क्षत्रीलाई कार्यवाहक राजदूत पौडेलले भेट गरी क्षतिपूर्ति रकम मिनाहा गर्न तथा समस्या समाधान गर्न दूतावासले अनेकौँ उपाय लगाइरहेको पीडित क्षत्रीलाई बताएका छन् ।
यता पीडित क्षत्रीले कार्यवाहक राजदूत पौडेलसँग भेट भएको तर, खासै नयाँ कुरा केही नभएको, पुरानै कुरा माफी गर्न लगाउने भन्ने कुरा गरेको बताए । मालिकले भने क्षतिपूर्ति रकम लिएर आए मात्र कुराकानी गर्ने नत्र कसैसँग भेट्ने समय नभएको भनेको क्षत्रीले बताए । ०६८ साल असारमा नेपालबाट एजेन्टले ड्राइभर भिसामा साउदी पठाए पनि त्यहाँ पुग्दा उनले थाहा उनलाई त लेबर भिसामा पो पठाएको रहेछ पछि उनले लेबर भिसालाई ड्राइभरमा चेन्ज गर्न कम्पनीसँग अनुरोध गर्दा कम्पनीले २५ सय साउदी रियाल मागेपछि कम्पनी छाडेर भागेका थिए ।
उनले कम्पनी छाडेपछि जुबेल भन्ने ठाउँमा १ वर्ष अवैध रूपमै काम गरे । त्यहीबेला अवैध कामदारहरूलाई साउदी सरकारले आममाफी दियो र मालिकले कफाला (१ वर्षपछि पालोपालो गरेर घर पठाउँछु) भनेपछि त्यहीबेला नै उनले नेपाल फर्कनका लागि आउटपास लिएर बसेका थिए । तर, दुर्भाग्य नेपाल उड्नु ‘१०–१५ दिन बाँकी हुँदा उनले चलाएको गाडीको ड्राइभर साइडको अगाडिको टायर पड्कियो र उनले चलाएको गाडी दुर्घटनामा प¥यो । उनले चलाएको गाडी अर्को साइडमा गएर उताबाट आएको ट्रेलामा (ठूलो) गाडीमा ठोकिएर आगलागी भएर दुबै गाडी जलेर नष्ट भयो र अर्को गाडीको चालकको पनि निधन भयो ।
उनको पनि हत्केलमा ठूलो चोट लागेको र ६ महिनापछि मात्र हल्का ठिक हुँदै थियो । राम्रोसँग हात ठिक नहुँदै फेरि मालिकले गाडी चलाउन भनेका थियो, केस सकिएको छैन म मिलाउँदै छु केस नमिलेसम्म गाडी चलाउन भनेर दबाब दिएको उनले बताए । पछि उनले धेरै विवाद गरेपछि मालिकले प्रहरी कहाँ लागेर जिम्मा दियो र उनलाई जेलमा लगियो । जेल बसेको १ वर्षपछि अदालतमा लगेको लगेर गाडीको क्षतिपूर्तिबापत ७९ हजार साउदी रियाल अर्थात् नेपाली रूपैयाँ करिब २५ लाख तिर्नुपर्ने फैसला गरेको उनले बताए ।
