काठमाडौं– कतारमा कार्यरत विदेशी श्रमिकको तलब वृद्धि भएको छ । कतार सरकारले १ हजार रियालभन्दा कम पारिश्रमिक भएका आप्रवासी श्रमिकहरूको तलब ८ सय रियालले बढाएको हो । नेपालस्थित कतारी दूतावासले सार्वजनिक गरेको प्रतिवेदनमा प्रतिमहिना १ हजार रियाल अर्थात् ३० हजार नेपाली रूपैयाँभन्दा कम पारिश्रमिक भएका श्रमिकको तलब १ हजार ८ सय रियाल अर्थात ५० हजार नेपाली रूपैयाँ पुगेको जनाइएको छ ।
दूतावासले जारी गरेको प्रतिवेदनअनुसार अब खान, बस्नको व्यवस्था भएका कम्पनीले विदेशी श्रमिकलाई महिनाको १ हजार रियाल तलब दिनु पर्ने छ भने खान बस्नको व्यवस्था नभएका कम्पनीले १ हजार ८ सय रियाल पारिश्रमिक दिनु पर्ने भएको छ । यसबाट १ हजारभन्दा कम पारिश्रमिक लिएर काम गर्दै आएका नेपालीहरूलाई पनि लाभ मिल्ने बताइएको छ ।
कतारको श्रम मन्त्रालयले सार्वजनिक गरेको प्रतिवेदनअनुसार नयाँ तलबमान व्यवस्था लागू भएपछि १ हजार रियालभन्दा कम पारिश्रमिक पाइरहेका ३ लाख ८ हजार १ सइ ४६ जना विदेशी श्रमिकले १ हजार ८ सय रियाल पारिश्रमिक पाउन थालेका छन् । आगामी वर्ष २०२२ को नोभेम्बर–डिसेम्बरमा विश्वकप फुटबल आयोजना गर्न लागेको कतारले अप्रिल २०१८ देखि नै राष्ट्रिय श्रम संगठनको कार्यालय कतारको राजधानी दोहामा राख्न दिएर काम गर्न थालेको पनि समाचारमा जनाइएको छ ।
पछिल्लो समय कतार सरकार आप्रवासी श्रमिकको हकमा विभिन्न सुधाकार काम गर्दै आएको जनाएको छ । काठमाडौंस्थित कतारी दूतावासले विज्ञप्तिमार्फत कतारमा घरेलु श्रमिकका लागि मानक रोजगारी सम्झौता गरेर अधिकारका लागि सचेतनामूलक कार्ययोजना गर्ने कार्यक्रम कतार सरकारले तय गरेको जनाएको छ । कतार सरकारले घरेलु श्रमिकलाई अन्य श्रमिकसरह व्यवहार गर्ने सेवासुविधा प्रदान गर्ने, आराम तथा बसोबासको व्यवस्था गर्ने र उनीहरूलाई काम चित्त नबुझेमा रोजगारदाता परिवर्तन गर्न अधिकार दिएको पनि दूतावासको विज्ञप्तिमा उल्लेख छ ।
-1745656903.jpeg)