काठमाडौं– नेपाल वैदेशिक रोजगार व्यवसायी संघको चुनाव नजिकिएसँगै अध्यक्षका आकाक्षीहरू बढ्न थालेका छन् । यसै सन्दर्भमा नेपाल लोकतान्त्रिक वैदेशिक रोजगार व्यवसायी एसोसिएसनका तर्फबाट ५ जना र प्रगतिशिल वैदेशिक रोजगार व्यवसायी मञ्चका तर्फबाट ३ जना अध्यक्षका आकाक्षी देखिएका हुन् ।
संघको चुनावको मिति घोषणा भएसँगै अध्यक्षमा आकाक्षीहरूले दाबी गर्न थालेको एसोसिएसनका अध्यक्ष नरेन्द्रप्रसाद ढकालले बताएका छन् । एसोसिएसनले साझा उम्मेदवार बनाएर चुनाब लढ्ने बताएका ढकालले अहिलेसम्म ४–५ जना आकाक्षी देखिएको बताए पनि नाम भने खुलाएनन् । अहिले चुनावमा कसरी जाने भन्ने विषयमा छलफल भइरहेको र केही समयमा नै उम्मेदवारको टुंगो लाग्ने उनले बताए । एसोसिएसनले साझा र व्यवसायिक व्यक्तिलाई उम्मेदवार बनाएर अगाडि बढाउने उनले बताएका छन् ।
सत्ता गठबन्धनमा रहेका दलका व्यवसायी संघ संगठनले गठबन्ध बनाएर जानका लागि आग्रह गरिएको भए पनि अहिले नै यस विषयमा निष्कर्षमा पुगिनसकिएको अध्यक्ष ढकालले बताएका छन् । अहिले सरकारमा नेपाली कांग्रेस, माओबादी केन्द्र, नेकपा एकीकृत समाजवादी र जसपाको गठबन्धन रहेको छ । ‘एसोसिएनले एक्लै चुनाव लड्ने की मिलेर लड्ने भन्ने विषयमा पनि छलफल भइरहेको छ, अघिल्लो चुनावमा एक्लै जितेकाले अहिले पनि सोहीअनुसार अगाडि बढ्नु पर्छ भन्ने छैन, मिलेर जानु पर्छ,’ अध्यक्ष ढकालले भने । जोसँग जसरी गठबन्धन बनाए पनि नबनाए पनि व्यवसायीका हक हितमा कार्य गर्ने नेतृत्व आउने गरी एसोसिएसनल लागिरहेको ढकालले बताएका छन् ।
सत्तारूढ नेपाली कांग्रेसनिकट एसोसिएसनका तर्फबाट संघका कार्यवाहक अध्यक्ष कमल तामाङ, द्वितीय उपाध्यक्ष कमलदेव मल्ल, महासचिव सुजितकुमार श्रेष्ठ, पूर्वद्वितीय उपाध्यक्ष भुवनसिंह गुरूङलगायतले अध्यक्षमा आकाक्षा देखाएको बताइएको छ । यता प्रमुख प्रतिपक्षी दल नेकपा एमालेनिकट प्रगतिशिल वैदेशिक रोजगार व्यवसायी मञ्चले पनि चुनाव लक्षित गरी कार्यक्रम र छलफललाई अगाडि बढाइरहेको छ । आगामी चुनावमा कसरी जाने भन्ने विषयमा विभिन्न समयमा छलफल भइरहेको मञ्चका कार्यवाहक अध्यक्ष राजेन्द्र भण्डारीले बताएका छन् । अध्यक्षका आकाक्षी धेरै भए पनि मुख्य रूपमा ३ जना अगाडि देखिएको अध्यक्ष भण्डारीले बताए ।
मञ्चको तर्फबाट पूर्वअध्यक्ष हरिबहादुर पाण्डे, पूर्ववरिष्ठ उपाध्यक्ष मुक्तिनाथ अधिकारी र मञ्चका कार्यवाहक अध्यक्ष भण्डारीमध्ये एक जना अध्यक्षको उम्मेदवार हुने पनि बताइएको छ । मञ्चले सर्वसम्मत रूपमा उम्मेदवार छनोट गर्ने त्यसपछि गठबन्धनका विषयमा पनि छलफल गरिने कार्यबाहक अध्यक्ष भण्डारीले बताएका छन् । अहिले सरकारमा रहेका दलका व्यावसायी संगठनसँग पनि चुनावी गठबन्धन हुन सक्ने उनले बताए ।
यता सत्तारुढ दल नेकपा माओवादी केन्द्रनिकट वैदेशिक रोजगार व्यवसायी गणतन्त्रिक मञ्चका अध्यक्ष रामप्रसाद भन्तनाले संघको आगामी कार्यकालका लागि अध्यक्षमा उम्मेदवारी दिने बताइसकेका छन् । उनले गठबन्धन भए पनि नभए पनि आपूm अध्यक्षको उम्मेदवार बन्ने बताइसकेका छन् ।
-1752335779.jpg)
