दोहा– ओमानमा कोरोनाले थलिएकी एक नेपाली महिलालाई एअर–स्ट्रेचरमार्फत नेपाल पठाइएको छ । ओमानस्थित नेपाली दूतावास र एनआरएनए ओमानको संयोजन तथा सहयोगमा नेपाली महिलालाई एअर–स्ट्रेचरको व्यवस्था गरी सपना कार्कीलाई नेपाल फिर्ता गरिएको हो ।
ओमानमा घरेलु कामदारको रूपमा कार्यरत कार्कीलाई महिलामा कोभिड–१९ को संक्रमण भई सलालास्थित सुल्तान काबुस अस्पतालमा भर्ना भएकोमा पोस्ट–कोभिड–निमोनिया भएको र त्यसमा थप संक्रमणहरू भई अर्ध–प्यारालाइसिससमेत भएर अस्पतालमा थलिएकी थिइन् । दूतावासका अनुसार निजलाई खानासमेत नाकबाट पाइपको सहाराले दिइरहेको थियो भने दिसा–पिसाब अतिरिक्त थैलीमा व्यवस्थापन गर्ने गरिएको थियो । उनी विगत ७ महिनादेखि अस्पतालमा उपचाररत रहेकामा गत ३ महिनादेखि अस्पतालले अब थप सुधार हुन समय लाग्ने र यो अवस्थामा नेपाल लान सकिने भन्ने जानकारी गराएको थियो ।
नेपालमा उनको परिवारका छोरी–ज्वाईंसँग सर–सल्लाह गरी नेपाल पठाउने सहमतिअनुसार उनको यात्रा समन्वय गरिएको थियो । उनलाई सलालाबाट मस्कटसम्म ओमान एअरको विमानबाट तथा मस्कटदेखि काठमाडौं सलाम एअरको विमानबाट स्ट्रेचरको व्यवस्था गरी नेपाल लगिएको थियो । उनलाई नेपाल पठाउन ३१२६ ओमानी रियाल (करिब नेपाली रूपैया ९ लाख ८८ हजार ३१६) खर्च लागेको थियो जसमा उनको छोरी–ज्वाईंले नेपाली रूपैयाँ ३ लाख १२ हजार ६५० व्यहोर्नु भएको थियो भने बाँकी रकम दूतावास र एनआरएनएको संयोजनमा जुटाइएको थियो ।
उनको उपचारमा लागेको खर्च अस्पतालले मिनाहा गरेको छ । उक्त यात्रा व्यवस्थापनमा मस्कटमा नेपाली दूतावासका कार्यवाहक राजदूत सोमेश थापा, श्रम सहचारी दिनेश ढकाल र एनआरएनएको तर्फबाट अध्यक्ष विकल झा विमानस्थल पुगेका थिए ।
