काठमाडौं– बाग्लुङका दुई स्थानीय तहले वैदेशिक रोजगारीमा गएकाहरूको विवरण राख्न थालेका छन् । जिल्लाको बाग्लुङ नगरपालिका र काठेखोला गाउँपालिकाले विवरण राख्न थालेका हुन् । वैदेशिक रोजगारी, वैदेशिक अध्ययन, रोजगारीका समस्या, पुनःस्थापना र समस्याका विषयमा जानकारी राख्ने उद्देश्यले यी पालिकाहरूले विदेश जानेको लगत राख्न थालेको बताएका छन् ।
वैदेशिक रोजगारमा रहेका नागरिक र उनीहरूको परिवारको अवस्था पहिचानका लागि पालिकाहरूले वैदेशिक रोजगारसम्बन्धी पाश्र्वचित्र निर्माण गर्न सुरु गरेको जनाइएको छ । विदेशमा रहेकाहरूको विवरण लगत संकलन गरेर यी स्थानीय तहले आप्रवासीहरूको प्रोफाइल नै निर्माण गर्ने जनाएका छन् । संकलन गरेको तथ्यांक प्रोफाइलका रूपमा राखिने र आगामी नीति तथा कार्यक्रम बनाउँदा त्यसैका आधारमा तयार गरिने बाग्लुङ नगरपालिकाका नगर प्रमुख जनकराज पौडेलले बताएका छन् । प्रोफाइल निर्माणका लागि बाग्लुङ नगरपालिकाले ४ लाख १६ हजार र काठेखोला गाउँपालिकाले ४ लाख ८ हजार रूपैयाँ विनियोजनसमेत गरेको बताइएको छ । प्रत्येक वडामा एक गणकको व्यवस्थापन गरी क्षेत्रगत रूपमा नै तथ्यांक संकलनको कार्य गरिने जनाइएको छ ।
नगरपालिकाले १४ र गाउँपालिकाले ८ जना गणक छनोट गरी तथ्यांक संकलन गर्न थालेको जनाएका छन् । गणकले कोवो सफ्टवेयरमार्फत तथ्यांक संकलन गर्ने बताइएको छ । दुई स्थानीय तहले खटाएका २८ गणकले आगामी ४ माघभित्र आफ्नो जिम्मेवारीमा परेका वडाको रोजगारीका लागि गएको, अध्ययनका लागि गएको, वैदेशिक रोजगारीमा आश्रित परिवार, वैदेशिक रोजगारीमा फर्केका, रोजगारीबाट फर्केर पुनःस्थापित भइसकेकाको विवरण संकलन गर्नु पर्ने बताइएको छ ।
-1752335779.jpg)
