काठमाडौं– नेपाल ट्रेड युनियन महासंघ (जिफन्ट) ले सरकारले लागू गरेको निःशुल्क भिसा र टिकट (फ्रि भिसा, फ्रि टिकट) को निर्णयबाट पछि हट्न नमिल्ने जनाएको छ । वर्तमान सरकारले फ्रि भिसा, फ्रि टिकटको निर्णय प्रभावकारी कार्यान्वयन नभएको बाहनामा त्यसमा फेरबदल गर्ने प्रयत्न सुरु गरेको भन्दै जिफन्टले सो नीतिको प्रभावकारी कार्यान्वयन गर्नु पर्ने बताएको हो ।
जिफन्ट अध्यक्ष विनोद श्रेष्ठले नेपालमा मर्यादित काम नभएकै कारण धेरै नेपाली विदेश जान बाध्य भइरहेको बताएका छन् । उनले गन्तव्य मुलुकहरूमा पनि रोजगारी मर्यादित हुनु पर्नेमा उनले जोड दिए । नेपालमा वैदेशिक रोजगार व्यवसायी संस्थाहरूको संख्या पनि आवश्यकताभन्दा धेरै रहेको भन्दै उनले त्यसमा पनि कटौती हुनुपर्ने बताएका छन् । जिफन्ट अध्यक्ष श्रेष्ठले सरकार श्रमिकमैत्री नहुँदा तथा वैदेशिक रोजगार व्यवसायीहरूको ध्यान केवल कमाउनेमा केन्द्रित भएकाले वैदेशिक रोजगारमा जान चाहनेहरू समस्यामा परिरहेको बताए ।
जिफन्टले सन् २०२१ मा केन्द्रीय कार्यालयमा साउदी अरब, कतार, युएई, कुवेतलगायत मुलुकको रोजगारसँग सम्बन्धित १८ वटा निवेदन प्राप्त भएको र १ सय १ जनाले सहयोग पाएको जानकारी दिएको छ । त्यसमध्ये २० जनाको उद्धारमा मद्दत गरिएको थियो । साथै २५ जनाको राहदानी फिर्ता, २० जनासँग मेनपावर कम्पनीले बढी रकम मागेको विषयहरू रहेको बताइएको छ ।
-1752335779.jpg)
