काठमाडौं– वैदेशिक रोजगारको क्षेत्रमा हुन सक्ने ठगी नियन्त्रण गर्न शीघ्र प्रत्यूत्तर (¥यापिड रेस्पोन्स) टोली गठन गरिएको छ । सरकारले वैदेशिक रोजगारका क्षेत्रमा हुन सक्ने ठगी नियन्त्रण गर्न वैदेशिक रोजगार विभागका महानिर्देशकको प्रत्यक्ष अनुगमनमा रहने र निर्देशकको नेतृत्वमा टोली गठन गरहेको हो ।
यो टोलीमा सम्बन्धित अन्तर्निकायको प्रतिनिधित्व हुने बताइएको छ । विभागका निर्देशकको संयोजकत्वमा गठन गरिएको ¥यापिड रेस्पोन्स टिममा श्रम, रोजगार तथा सामाजिक सुरक्षा मन्त्रालय, वैदेशिक रोजगार बोर्डको सचिवालय, नेपाल प्रहरीका प्रतिनिधि सदस्य रहने जनाइएको छ । यसका साथै विभागका अनुसन्धान अधिकृत यो टोलीको सदस्य सचिव रहने छन् । श्रम, रोजगार तथा सामाजिक सुरक्षामन्त्री कृष्णकुमार श्रेष्ठले वैदेशिक रोजगारसम्बन्धी तमाम गुनासोलाई तत्काल निराकरण गर्न, राहत, उद्धार तथा क्षतिपूर्तिको सिफारिस गर्न तथा अन्तनिकाय समन्वयका लागि टोली गठन गरिएको बताएका छन् । टोलीले वैदेशिक रोजगार व्यवस्थापनमा कुनै सेवा प्रदायक निकाय, संघसंस्था तथा व्यक्तिले गलत नियतका साथ काम गरिरहेको वा गर्न लागेको कुनै सूचना प्राप्त भएमा छानबिन गर्न, आवश्यक निर्देशन दिन तथा थप अनुसन्धानका लागि सिफारिस गर्ने जिम्मेवारी पाएको छ ।
वैदेशिक रोजगारीको क्षेत्रलाई व्यवस्थित तथा मर्यादित बनाउने र कानुनको प्रभावकारी कार्यान्वयन गराउनमा टोलीले काम गर्ने जनाइएको छ । साथै वैदेशिक रोजगारीको क्षेत्रमा आउने गुनासोको तत्काल सम्बोधन गर्न टोलीले काम गर्ने पनि बताइएको छ । वैदेशिक रोजगारीलाई व्यवस्थित, मर्यादित बनाउन व्यवस्थापनमा सुधार ल्याउनु पर्ने र सोहीअनुसार टोली गठन गरिएको मन्त्री श्रेष्ठले बताए ।
-1752335779.jpg)
