काठमाडौं– श्रम, रोजगार तथा सामाजिक सुरक्षा मन्त्री कृष्णकुमार श्रेष्ठले श्रम शक्ति अर्थतन्त्रको मरुदण्ड भएको बताएका छन् । शुक्रकार काठमाडौंमा अन्तराष्ट्रिय आप्रवासन संगठनल आयोजना गरेको कार्यक्रममा मन्त्री श्रेष्ठले यस्तो बताएका हुन् ।
श्रमशक्ति देशको आर्थिक मेरुदण्ड भएकाले यसको सम्मान गर्नु पर्ने उनले बताएका छन् । वैदेशिक रोजगारीमा गएका तथा विदेशमा रहेका गैरआवासीय नेपालीहरूले देशको अर्थतन्त्र चलायमान बनाउन सहयोग पु¥याएको मन्त्री श्रेष्ठले बताए । आप्रवासन दिवसको अवसरमा आयोजना गरिएको कार्यक्रममा नेपाली श्रमिकको पारिश्रमिकमा विभेद् रहेको भन्दै यसलाई अन्त्य गर्नु पर्ने उनले बताए । ‘अन्य देशका श्रमिकले सोही काम गर्दै बढी ज्याल पाउने तर नेपालीले कम मात्रै ज्याला पाउने गरेको भन्दै यस्तो विभेद् अन्त्य गर्नु पर्छ,’ मन्त्री श्रेष्ठले भने । साथै उनले सरकार वैदेशिक रोजगारीलाई मर्यादित बनाउनेतर्फ लागिरहेको पनि बताएका छन् । वैदेशिक रोजगार नीति परिमार्जजन गर्नका लागि पनि सरकारले प्रयास गरिरहेको उनले बताए ।
मन्त्री श्रेष्ठका अनुसार ५–५ वर्षमा पुनरावलोकन गर्नु पर्ने नीति १० वर्षसम्म पनि पुनरावलोकन हुन नसकेको भन्दै यसका लागि सरकारले गृहकार्य सुरु गरेको छ । साथै सरकारले श्रमिकले सिकेको सीपलाई एकीकृत गर्न तर्फ पनि प्रयास गरिरहेको उनले बताए । वैदेशिक रोजगारीमा जाने श्रमिकहरूलाई दक्ष बनाउनेतर्फ पनि सरकार लागिरहेको मन्त्री श्रेष्ठको भनाइ थियो । त्यस्तै सोही कार्यक्रममा बोल्दै श्रम रोजगार तथा सामाजिक सुरक्षा मन्त्रालका सह–सचिव शेषनारायण पौड्लले आप्रवासन र विकासलाई अलग गर्न नसकिने बताएका छन् । आप्रवासनले गर्दा विकासको लहर आएको उनले बताए ।
उनका अनुसार द्वन्द्व तथा अन्य विपत्तिमा पनि नेपालको अर्थतन्त्र चलायमान हुनुमा वैदेशिक रोजगारी मुख्य कारण रहेको छ । ‘वैदेशिक रोजगारीले देशको विकासमा प्रभाव पारेकाले रोक्नु पर्छ भन्ने कुरा सुनिएको छ, त्यो गलत हो, बरु यसलाई विकासको मुलधारमा ल्याउनु पर्छ,’ सह–सचिव पौड्यले भने । त्यस्तै परराष्ट्र मन्त्रालयका सह–सचिव विष्णुदत्त गौतमले अहिले नै वैदेशिक रोजगारीमा जानेलाई रोक्न सक्ने अवस्था नरहेको भन्दै श्रमिकका हकहितका लागि काम गर्नु पर्ने बताएका छन् । व्यवस्थित बनाउनेतर्फ लाग्नु पर्छ बाध्यात्मक रूपमा वैदेशिक रोजगारीलाई रोकियो भने अवस्था गम्भीर हुने उनले बताए । साथै सीप सिकेर विदेश जानु पर्ने उनको तर्क थियो ।
-1752335779.jpg)
