काठमाडौं– अवैधानिक रुपमा कतारमा बसोबास गरिरहेका नेपाली श्रमिकहरुलाई वैध हुने विषयमा सचेतनामूलक कार्यक्रम आयोजना गरिएको छ । कतारमा रहेको नेपाली दूतावास र गैरआवासीय नेपाली संघ (एनआरएनए) कतारले संयुक्त रुपमा सचेतनामूलक कार्यक्रममा आयोजना गरेका हुन् ।
अहिले कतार सरकारले अवैधानिक रुपमा त्यहाँ बसोबास गरिरहेकाहरुका लागि आममाफीको प्रक्रियामार्फत वैध हुनका लागि आग्रह गरिरहेको अवस्थामा यसको फाइदा कसरी लिन सकिन्छ भन्ने विषयमा श्रमिकलाई जानकारी दिइएको बताइएको छ । कतारमा रहेको नेपाली दूतावासका अनुसार शुक्रबार सम्पन्न भएको कार्यक्रममा कतारमा कानुनी अवस्था गुमाएका नेपाली श्रमिकले कसरी वैधानिकता प्राप्त गर्ने भन्ने कुरा सिकाइएको थियो । कार्यक्रम सिमित मात्रामा भौतिक उपस्थिति रहेको र भर्चुल माध्यम जुमबाट पनि सहभागी भएर कार्यक्रम सम्पन्न गरिएको बताइएको छ ।
कतारले गएको १० अक्टोबरदेखि आममाफी दिने बताएको थियो । यो समय यही ३१ डिसेम्बरसम्म सम्म रहेको बताइएको छ । तोकिएको अवधिमा दिएको आममाफीको अवसरको सदुपयोग गरि वैध हुन दूतावासले नेपाली श्रमिकलाई अनुरोध गरिरहेको जनाएको छ । समय सकिँदै गर्दा अहिलेसम्म यो सुविधामार्फत आफ्नो कानुनी अवस्था सुधार्न नसकेकाहरुलाई सजिलो होस् भनेर दूतावासले कार्यक्रम आयोजना गरेको बताइएको छ ।
कम्पनीमा वर्किङ भिसामा कतार गएर विभिन्न कारणले कतारी आइडी नपाएका वा नवीकरण हुन नसकी अवैध रूपमा रहेकाहरूले कुनै रोजगारदाता कम्पनीबाट जब अफर लेटर लिई आवश्यक कागजातसहित विभिन्न केन्द्रमा गएर कानुनी अवस्था सुधार गर्न सक्ने जनाइएको छ । यसरी कानुनी अवस्था सुधार गर्दा अहिलेसम्मको जरिमाना छुट तथा मिनाहा हुनेछ भने जब अफर लेटर पेस गरेको कम्पनीमा रोजगारीका लागि कागजात नियमित गर्नसमेत सकिने बताइएको छ । त्यसका लागि विभिन्न स्थानमा गएर सेवा लिन सकिने जनाइएको छ । तोकिएका केन्द्रहरुमा उम्म सलाल सर्भिस सेन्टर, उम्म सुनाइम सर्भिस सेन्टर (साविकको इन्टस्ट्रियल एरिया) मेसाइमिर सर्भिस सेन्टर, अल वाक्रा सर्भिस सेन्टर र अल रैयान सर्भिस सेन्टर रहेका छन् ।
यसरी रोजगारी सुनिश्चित नभएकाहरूको हकमा भने स्वदेश फिर्तीको सहजीकरणसमेत गरिने दूतावासले जनाएको छ । त्यसका लागि सर्च एन्ड फ्लो अप डिर्पाटमेन्ट (एसएएफडी) मा रहेको काउन्टरमा नेपाल फर्कने टिकटको बुकिङ लिएर गएमा दण्ड जरिवाना छुट तथा मिनाहा गरी स्वदेश फर्कन पाइने पनि बताइएको छ । जुनसुकै प्रकारको भिसामा कतार गएको तर भिसाको म्याद समाप्त भई अहिले पनि कतारमै रहेकाहरूले भने नेपाल फर्कने टिकटको बुकिङ लिएर एसएएफडी मा उपस्थित भई दण्ड र जरिमाना मिनाहा गरी स्वदेश फर्कन सक्ने बताइएको छ । कतार सरकारले दिएको यस अवसरको सदुपयोग गरेर दण्ड जरिमानाबाट बचेर स्वदेश फर्किने वा कतारमै वैध भएर बस्ने अवस्था सिर्जना गर्न दूतावासले नेपाली श्रमिकलाई अनुरोधसमेत गरेको छ ।
-1752335779.jpg)
