काठमाडौं– वैदेशिक रोजगार व्यवसायलाई सम्मानित बनाउन व्यावसायीहरू नै नीति निर्माण तहमा पुग्नुपर्ने उनीहरूले बताएका छन् । नेपाली कांग्रेसको शुभेच्छुक संस्था नेपाल लोकतान्त्रिक वैदेशिक रोजगार व्यवसायी एसोसिएसनले काठमाडौंमा बिहीबार आयोजना गरेको सम्मान तथा बधाई कार्यक्रममा बोल्ने व्यावसायीहरूले यस्तो बताएका हुन् ।
मुलुकमा रोजगारको कुनै व्यावस्था नभएपछि वैदेशिक रोजगारमा जानु बाध्यत्मक अवस्था भएको भए पनि यो क्षेत्र सम्मानित हुन नसकेकोमा सरोकारवालाहरूले चिन्ता व्यक्त गर्न थालेका छन् । बिहीबारको कार्यक्रममा बोल्ने अधिकांश वक्ताहरूले वैदेशिक रोजगारीको क्षेत्रलाई सम्मानित र व्यवस्थित बनाउनका लागि यो क्षेत्रमा संलग्नहरू नीति निर्माण तहमा पुग्नु पर्ने बताए । वैदेशिक रोजगारीको क्षेत्रलाई सम्मानित र मर्यादित बनाउनका लागि नीति निर्माणको तहमा नै यो क्षेत्रको उपस्थिति हुनु पर्ने एसोसिएसनका वरिष्ठ उपाध्यक्ष तारानाथ अर्यालले बताएका छन् । यसका लागि कांग्रेसको आगामी महाधिवेशनबाट वैदेशिक रोजगारमा संलग्न व्यक्तिहरू केन्द्रीय समितिमा अनिवार्य रूपमा प्रतिनिधित्व गर्नु पर्ने उनले बताए ।
अर्थतन्त्रका मेरुदण्डका रूपमा रहेको यो क्षेत्रलाई सहजीकरण गर्नका लागि पनि पार्टीको नेतृत्वमा पुग्नु पर्ने आजको आवश्यकता रहेको नेपाल वैदेशिक रोजगार व्यवसायी संघका कार्यवाहक अध्यक्ष कमल तामाङले बताएका छन् । व्यवसायीको हक हितका लागि यो क्षेत्रमा संलग्न व्यक्ति जुनसुकै टिममा भए पनि सहयोग गरेर निर्वाचित गराउन लाग्नु पर्ने उनले बताए । त्यस्तै महाधिवेशन प्रतिनिधि तथा पूर्वउपाध्यक्ष सीतादेवी देवकोटाले अर्थतन्त्रलाई महत्वपूर्ण योगदान दिन यो क्षेत्रलाई सम्मान गर्नका लागि पनि पार्टीको केन्द्रीय समितिमा यो क्षेत्रको प्रतिनिधित्व हुनुपर्ने बताएकी छन् । व्यावसायीलाई सम्मानित बनाउनका लागि नेतृत्वमा पुग्नै पर्ने आवश्यकता रहेको उनले बताइन् । यो क्षेत्रमा देखिएका समस्या समाधान गर्न र नीति निर्माण मै पहल गर्नका लागि पनि यो क्षेत्रबाट प्रतिनिधित्व हुन आवश्यक रहेको मुस्लिम संघका केन्द्रीय अध्यक्ष अब्दुल सतारले बताएका छन् । मुस्लिम प्रतिनिधिलाई व्यवसायीका उम्मेदवारलाई भोट हाल्नका लागि अनुरोध गर्ने प्रतिवद्धता व्यक्त गरेका उनले आफूलाई पनि व्यवसायी साथीहरूले सहयोग गरिदिन अनुरोध गरे ।
त्यस्तै एसोसिएसनका पूर्वअध्यक्ष किरणकिशोर घिमिरेले व्यवसायबिना देश चन्न नसक्ने भन्दै नेतृत्वमा पनि व्यावसायीका प्रतिनिधिलाई पठाउनु पर्ने आवश्यकता रहेको बताएका छन् । जसले राष्ट्रको अर्थतन्त्रमा प्रभाव पार्ने क्षेत्रलाई मर्यादित बनाउन नीति बनाउन सहयोग पुग्ने उनले बताए । अर्का पूर्वअध्यक्ष विमल ढकालले यो क्षेत्रबाट गएर केन्द्रीय सदस्यमा उम्मेदवार भएका व्यक्तिहरूलाई निर्वाचनामा विजयी बनाउनु पर्ने धारणा व्यक्त गरे ।
संस्थाप अध्यक्ष तिलक रानाभाटले देशको उन्नति गराउनका लागि व्यवसाय अति आवश्यक भएको बताएका छन् । त्यसैले कांग्रेस पार्टीलाई पनि व्यवसायीले योगदान गर्नु पर्ने उनले बताए । ‘व्यवसायलाई मर्यादित बनाउन पनि यो क्षेत्रमा संलग्न व्यक्तिहरू विजयी हुन आवश्यक रहेको छ, त्यसका लागि सबैले पहल गर्नु पर्छ,’ संस्थापक अध्यक्ष रानाभाटले भने । अब्बल हुनका लागि नेतृत्वमा पुग्नु पर्ने र त्यहाँ पुगेपछि व्यावसायीका समस्या समाधान गर्नका लागि पहल गर्नु पर्ने एसोसिएसनका अध्यक्ष नरेन्द्रप्रसाद ढकालले बताएका छन् । उनले कांग्रेसका मन्त्रीले लागू गरेको फ्रि भिसा फ्रि टिकटको व्यवस्था पनि कांग्रेसकै सरकारले पुनर्विचार गर्नु पर्ने अवस्था आएको बताए ।
महाधिवेशन प्रतिनिधिलाई सम्मान
एसोसिएसनमा आबद्ध रहेर नेपाली कांग्रेसको महाधिवेशन प्रतिनिधिमा निर्वाचित भएका व्यक्तिहरूलाई सम्मान गरिएको छ । बिहीबार एक कार्यक्रम गरेर एसोसिएसनले विभिन्न जिल्लाबाट प्रतिनिधिका रूपमा चयन भएका ३० जनालाई खादा मालासहित सम्मान गरेको हो ।
कांग्रेसको १४औँ महाधिवेशनमा छनोट भएका वैदेशिक रोजगारीमा संलग्न व्यक्तिहरूलाई सफलताको कामनासहित सम्मान र बधाई ज्ञापन गरिएको एसोसिएसनका महासचिव भवानी निरौलाले बताएका छन् । एसोसिएसनमा आवद्ध भएर वैदेशिक रोजगारीमा संलग्न रहेका संस्थापक अध्यक्ष तिलकबहादुर रानाभाट, पूर्वअध्यक्षहरू विमल ढकाल, किरणकिशोर घिमिरे, प्रज्ञान न्यौपाने र यामबहादुर केसीसहित महाधिवेशन प्रतिनिधिलाई सम्मान तथा बधाई ज्ञापन गरेको हो । रानाभाट कास्की, ढकाल रूपन्देही, घिमिरे र न्यौपाने दाङ र केसी रुकुम पश्चिमबाट नेपाली कांग्रेसको महाधिवेशन प्रतिनिधिमा छनोट भएका हुन् । त्यस्तै गोरखाबाट महाधिवेशन प्रतिनिधि भएका मुस्लिम संघका अध्यक्ष अब्दुल सतारलाई पनि संघले सम्मान गरेको छ ।
त्यस्तै पूर्ववरिष्ठ उपाध्यक्ष ऋषि शर्मा, एसोसिएसनका पूर्वउपाध्यक्ष सीतादेवी देवकोटा, कार्यसमिति सहसचिव मच्छिन्द्रनाथ शर्मा, पूर्वकोषाध्यक्ष मित्रदेव घिमिरेलाई पनि सम्मान गरिएको छ । यसैबीच, मनाङ जिल्ला सभापति शंकर गुरुङ, एसोसिएसनका सदस्यहरू बलबहादुर तामाङ, राधिका कटुवाल, श्याम श्रेष्ठ, युवराज गुरुङ, सदस्य तथा जनसम्पर्क समिति मलेसियाबाट महाधिवेशन प्रतिनिधि रहेका चोलाकान्त पंगेनी र नवलकिशोर यादवलाई पनि सम्मान गरिएको महाचविब निरौलाले बताएका छन् ।
त्यस्तै सदस्यहरू बलभद्र ढकाल, भीम रोक्का, मनोज खड्का, अम्बिका शर्मा, घनश्याम तामाङ, राजेश गौतम, राजेश्वर राय, सर्वधन तामाङ, जनसम्पर्क समिति साउदी अबरबाट महाधिवेशनमा आएका अर्जुन थापा र आसुतोष मिश्रलाई सम्मान गरिएको हो । त्यस्तै जिल्ला कार्य समिति ओखलढुंगाको उप–सभापतिमा निर्वाचित संघका कार्यवाहक अध्यक्ष कमल तामाङलाई बधाइ तथा सफलताको शुभकामना व्यक्त गरिएको थियो ।
-1745656903.jpeg)