काठमाडौं– श्रम, रोजगार तथा सामाजिक सुरक्षा मन्त्रालयले वैदेशिक रोजगारीका समस्या र चुनौतीहरूको सम्बोधन र व्यवस्थापनका लागि कार्यदल निर्माण गरेको छ । मन्त्रालयले सीप विकास सम्बन्धी तालिम एकीकृत संरचनामार्फत सञ्चालन गर्न, वैदेशिक रोजगारीलाई व्यवस्थित बनाउन, नीतिगत सुधार गर्न, श्रम कूटनीतिलाई प्रभावकारी बनाउन मन्त्रालयका सहसचिवको नेतृत्वमा कार्यदल गठन गरेको हो ।
सो कार्यदलले वैदेशिक रोजगारीको क्षेत्रका अलावा आन्तरिक रोजगारीलाई व्यवस्थित बनाउनका लागि पनि सुझाव पेस गर्ने बताइएको छ । विभिन्न मन्त्रालय र मातहतका निकायले प्रदान गर्दै आएका सीप विकाससँग सम्बन्धित तालिमहरू एकीकृत संरचनामार्फत सञ्चालन गर्न सम्भावना र चुनौतिबारे अध्ययन गर्न कार्यदल बनाइएको छ । त्यस्तै फरक फरक निकायबाट प्रदान गरिने उस्तै किसिमका तालिमहरू सञ्चालन हुने र एउटै व्यक्तिले विभिन्न तालिम लिने तर काम नपाउने समस्या रहेकाले त्यसको समाधानका लागि कार्यदल निर्माण गरिएको जनाइएको छ ।
व्यावसायिक तथा सीप विकास तालिम प्रतिष्ठानका कार्यकारी निर्देशक बद्रीनाथ अधिकारीको संयोजकत्वमा विभिन्न मन्त्रालय र राष्ट्रिय योजना आयोगका प्रतिनिधि सम्मिलित ६ सदस्यीय कार्यदललाई १५ दिनभित्र प्रतिवेदन पेस गर्न भनिएको छ । अहिले धेरै निकायबाट प्रदान हुँदै आएका छोटो समयका तालिमहरू साविककै संरचना वा नयाँ संरचनामार्फत सञ्चालन गर्ने विषयमा पनि कार्यदलले सुझाव दिने जनाइएको छ । त्यस्तै देशभित्र रोगजारीको अवसर वृद्धि गर्ने, स्वरोजगारीका लागि प्रोत्साहित गर्न तथा सम्मानजनक वैदेशिक रोजगारीका लागि प्रतिस्पर्धी तथा सीपयुक्त जनशक्ति तयार गर्न आवश्यक योजनाहरूको बारेमा पनि कार्यदलले अध्ययन गरेर सुझाव दिनु पर्ने कार्यभार तोकिएको छ ।
साथै मन्त्रालय र मातहतका निकायहरूको संगठनात्मक संरचनाको अवस्थाबारे अध्ययन गर्न पनि कार्यदल बनाइएको छ । कार्यदलले वैदेशिक रोजगारी तथा श्रम कार्यालयहरूसहित मातहतका निकायहरूको कार्यबोझ, कार्यप्रगतिको सुधारका सम्भावनाहरूको अध्ययन गर्ने अधिकार पाएको छ । सो कार्यदल मन्त्रालयका सहसचिव रामचन्द्र ढकालको संयोजकत्वमा गठन गरिएको हो । ६ सदस्यीय सो कार्यदलले वैदेशिक रोजगार तथा श्रम कार्यालयका समस्या, चुनौती र समाधानका उपायहरूका साथै श्रम सहचारी नियुक्तिको मापदण्डबारे पनि सुझाव पेस गर्ने बताइएको छ । यो कार्यदललाई पनि १५ दिनको समय दिइएको छ ।
यसका साथै वैदेशिक रोजगार व्यवस्थापन तथा समग्र कार्यप्रणाली व्यवस्थित गर्न सहसचिव शेषनारायण पौडेलको संयोजकत्वमा अर्को कार्यदल बनाइएको छ । यो कार्यदलमा ७ सदस्य रहेका छन् । सो कार्यदलले वैदेशिक रोजगार नीति तथा कार्ययोजना पुनरावलोकन र प्रभावकारी कार्यान्वयनका लागि सुझाव दिन भनिएको छ ।
-1745656903.jpeg)