दोहा– कुवेतका लागि नेपाली राजदूत दुर्गाप्रसाद भण्डारीले त्यहाँ नेपाली कार्यरत कम्पनीको स्थलगत भ्रमण तथा नेपाली कामदारहरूसँग छलफल गरेका छन् । कुवेतका कम्पनीमा कार्यरत नेपालीहरूको रोजगारीको अवस्था सर–सुविधा, कार्यस्थलको भौतिक अवस्था समेत बुझ्ने तथा कामदारहरूले थाहा पाउनै पर्ने केही महत्वपूर्ण विषयमा जानकारी उपलब्ध गराउने क्रममा ’ल्याण्ड मार्क’ कम्पनीको भ्रमण गरी कम्पनी व्यवस्थापन र नेपाली कामदारसँग भेटघाट तथा छलफल गरेको नेपाली दूतावासले जनाएको छ ।
दूतावासको तर्फबाट उक्त कम्पनीमा कार्यरत नेपाली कामदारहरूको सेवा, सुविधा, कार्यस्थलमा सुरक्षा, बासस्थान व्यवस्था आदिबारे बुझ्नुका साथै स्वास्थ्य हेरचाह, कंपनी व्यवस्थापन र कामदारबीचको असल सम्बन्धको विकास, कामप्रतिको लगनशीलताबारे जानकारी लिएको जनाएको छ ।
यस्तै, अनुशासन, आफ्ना अत्यावश्यक कागजातको सुरक्षा, बसाइको वैधानिकताको आवश्यकता, आम्दानी रकमको औपचारिक तरीकाले स्वदेश पठाउने तथा दूतावासबाट नेपाली कामदारको हितमा प्रवाह गरिँदै अएको सेवा आदिबारे नेपालीहरूलाई जानकारी गराइएको थियो । राजदूत भण्डारीको नेतृत्वमा दूतावासका मिनिष्टर काउन्सेलर प्रकाशमणि पौडेल र श्रम सहचारी हेमकुमार अधिकारीलगायतको टोलीले उक्त कम्पनीको भ्रमण गरेको थियो ।
