काठमाडौं– रोजगारीका लागि इजरायल जानका लागि छनोट भएका व्यक्तिहरूलाई कोभिडविरुद्धको खोप लगाउन विभिन्न अस्पतालहरू तोकिएको छ । मंगलबार वैदेशिक रोजगार विभागले काठमाडौंका ५ वटा अस्पतालमा गएर खोप लगाउन सकिने जानकारीसहित अस्पतालको नामावाली सार्वजनिक गरेको हो ।
खोप लगाउनका लागि वीर अस्पताल, निजामती सेवा अस्पताल, नेपाल प्रहरी अस्पताल महाराजगन्ज, वीरेन्द्र अस्पताल छाउनी र सशस्त्र प्रहरी बलको अस्पताल बलम्बुमा गएर कोरोनाविरुद्धको खोप लगाउन सकिने व्यवस्था गरिएको विभागले जनाएको छ । यी केन्द्रहरूमा खोप लगाउन जानुअघि विभागको इजरायल शाखामा सम्पर्क गरेर जान पनि सूचनामा भनिएको छ । इजरायलको दीर्घकालीन स्याहार केन्द्रमा सहायक श्रमिक पठाउने प्रयोजनका लागि पिआइबिएद्वारा छनोट भएका र कोरोनाविरुद्धको खोप लगाउन बाँकी उम्मेदवारहरूलाई खोप लगाउनका लागि विभागले अनुरोध गरेको हो ।
यसैबीच, इजरायलको रोजगारीका लागि छनोट भएका व्यक्तिहरूको भिसाका लागि राहादानीको म्याद तीन वर्षको हुनु पर्ने बताइएको छ । रोजगारदाताबाट करार सम्झौता प्राप्त हुने युवाहरूले भिसाका लागि अनिवार्य रूपमा तीन वर्ष म्याद भएको पासपोर्टको अनिवार्य गरिएको हो । विभागका अनुसार छनोट भएर रोजगारदाताबाट स्ट्याडर्ड इम्प्लोइमेन्ट कन्ट्र्याक्ट प्राप्त हुने उम्मेदवारहरूको भिसाका लागि सम्बन्धित निकायमा प्रक्रिया थाल्ने समयमा पासपोर्टको म्याद अनिवार्य रूपमा तीन वर्षको हुनु पर्नेछ ।
इजरायल र नेपाबीच भएको समझदारीमा भिसाको प्रक्रिया थालनी गर्न पासपोर्टको म्याद सकिने अवधि कम्तीमा तीन वर्ष बाँकी रहेको हुनु पर्ने प्रावधान रहेको छ । त्यसैले ३१ जनावरी सन् २०२५ भन्दा पहिले नै राहदानीको समय सकिने भए काठमाडौंमा रहेको राहदानी विभागबाट पासपोर्ट नवीकरण गराउन विभागले आग्रह गरेको छ । समय सकिएको पासपोर्ट भएकाहरूले नवीकरण गराएर अबको ५ दिनभित्र विभागको इजरायल शाखामा सम्पर्क गर्न विभागअन्तर्गतको इजरायल शाखाले सम्पर्क गर्न सूचनामा भनिएको छ ।
-1752335779.jpg)
