काठमाडौं– मलेसियामा श्रम शोषण गर्ने एक बहुराष्ट्रिय कम्पनीविरुद्ध अनुसन्धान सुरु भएको छ । मलेसियामा रहेको गुड ईयर टायरमा कम्पनीले श्रम शोषण गरेको विषयमा अमेरिकी अनुसन्धानकर्ताहरूले अनुसन्धान थालेका हुन् ।
अनुशन्धानकर्ताहरूले सो कम्पनीमा काम गर्ने श्रमिकहरूसँग अन्तर्वार्ता सुरु गरेको त्यहाँका स्थानीय सञ्चार माध्यमले जनाएका छन् । सो कम्पनीले महिनौँसम्म तलब नदिई काममा लगाएको, अतिरिक्त कामको पारिश्रमिक नदिएको तथा बसोबास स्थलको समेत उचित व्यवस्था नगरेको भन्दै मलेसियाको अदालतले तत्काल रकम भुक्तानी गर्न आदेश दिएको थियो । तर कम्पनीले अदालतको आदेशपछि उच्च अदालतमा त्यसविरुद्ध अपिल गरेको छ । सो कम्पनीले श्रम शोषण गरेको भन्दै नेपाल, बंगलादेशलगायत मुलुकका १ सय ८५ श्रमिकले सन् २०१९ र २०२० मा मुद्धा दायर गरेका थिए । गुड ईयर विश्वकै ठूलो टायर निर्माता कम्पनी मध्येको एक हो ।
गुड ईयर कम्पनीमा श्रमिकको शोषण भएको मुद्धा परेपछि र सो मुद्धा अन्तर्राष्ट्रियकरण हुँदै गएपछि अमेरिकाले यसका विषयमा छानबिन थालेको हो । गुड ईयरमा कार्यरत श्रमिकहरूले बसोवासस्थलका विषयमा तथा कार्यस्थलका विषयमा प्रश्नहरू सोधिएको समाचारमा जनाइएको छ । सो कम्पनीविरुद्ध सन् २०१९ मा दुईवटा तथा सन् २०२० मा एक गरी तीन वटा मुद्धा परेको समाचारमा उल्लेख छ । श्रमिकहरूले मलेसियाको श्रम कानुनअनुसार पाउनु पर्ने सुविधा नपाएको भन्दै मुद्धा दर्ता गराएको बताइएको छ ।
त्यहाँको स्थानीय अदालतले श्रमिकको पक्षमा फैसला गरेको जनाइएको छ । अदालतको फैसलामा विदेशी श्रमिकले स्थानीय श्रमिकले पाउनेसरहको सुविधा विदेशी श्रमिकलाई पनि उपलब्ध गराउनु पर्ने उल्लेख गरेको छ । कम्पनीलाई श्रमिकको कटौती गरिएको तथा उपलव्ध नगराइएको रकम तत्काल भुक्तानी गर्नसमेत अदालतले आदेश दिएको समाचारमा जनाइएको छ ।
