काठमाडौं– श्रम रोजगार तथा सामाजिक सुरक्षा मन्त्री कृष्णकुमार श्रेष्ठ (किसन) ले नाम मात्रको सम्झौता नगरिने बताएका छन् । मन्त्रालयले आयोजना गरेको कतार संयुक्त कार्यसमिति बैठकको तयारी सम्बन्धमा सरोकारवालाहरूसँगको छलफल कार्यक्रममा यस्तो बताएका हुन् ।
सम्झौताका नाममा सम्झौता गर्ने पक्षमा आफू नरहेको भन्दै लागू हुने सम्झौता मात्र गरिने मन्त्री श्रेष्ठले बताए । देखाउनका लागि मात्रै नभएर व्यवहारिक रूपमा लागू हुने देशसँग मात्रै सम्झौता गरी लागू गरिने उनले बताएका छन् । सोही कार्यक्रममा मन्त्री श्रेष्ठले कतार भिसा सेन्टरले सिन्डिकेट गरेको र श्रमिकसँग चर्को शुल्क असुली गरेको गुनासो आएको भन्दै त्यस विषयमा अध्ययन गरिएरको पनि जानकारी दिए । कतार सरकारसँग दुई तीनवटा प्रदेशमा तालिम केन्द्र सञ्चालनका लागि नेपालका तर्फबाट यसअगाडि नै प्रस्ताव गरिएको र आगामी बैठकमा यसबारेमा निर्णय हुन सक्ने सम्भावना रहेको मन्त्री श्रेष्ठको बताए ।
छलफलमा सहभागी व्यवसायी, नागरिक समाजका प्रतिनिधिहरूले कतारसँगको आगामी संयुक्त बैठकमा नेपालका तर्फबाट उठाउनु पर्ने विषयहरूको सुझावसमेत दिएका थिए । सो क्रममा कतारमा नेपालीको मृत्युको कारण खोजिनु पर्ने, मृतकको पोस्टमार्टम गर्नुपर्ने, न्यायमा पहुँच वृद्धि गर्नुपर्ने, कतार भिसा सेन्टरले श्रमिकसँग चर्को रकम असुलिरहेको भन्दै यो कार्य रोक्न सरकारले ध्यान दिनु पर्ने बताएका थिए । साथै मन्त्री श्रेष्ठले श्रमिकलाई ठग्ने गरी काम नगर्न वैदेशिक रोजगार व्यवसायीलाई आग्रहसमेत गरेका छन् ।
मन्त्री श्रेष्ठले व्यवसायीहरूसँग हातेमालो गरेर अगाडि बढ्न तयार रहेको भन्दै पूर्वसर्तका रूपमा श्रमिक ठगिन नहुने बताएका हुन् । व्यवसायीहरूबीच देखिएको अस्वस्थ प्रतिस्पर्धाका कारण श्रमिक मारमा पर्ने अवस्था अन्त्य हुनुपर्ने मन्त्री श्रेष्ठले बताए । ‘तपाईहरू कसम खानुस्। श्रमिकको अहित गर्दिनँ भनेर म व्यवसायीको संरक्षण गर्न प्रतिवद्ध छु,’ मन्त्री श्रेष्ठले भने । मन्त्री श्रेष्ठले वैदेशिक रोजगार व्यवसायीहरूलाई एक आपसमा मर्ज भएर अगाडि बढ्नसमेत सुझाव दिएका छन् । कार्यक्रममा वैदेशिक रोजगार व्यवसायीका विभिन्न संघसंस्थाका प्रतिनिधिहरू ठूलै सहभागी रहेको थियो । यसैगरी, कतिपय वैदेशिक रोजगार व्यवसायीले भिजिट भिसाको कारोबार गरिरहेकोतर्फ लक्षित गर्दै मन्त्री श्रेष्ठले भने, ‘तपाईहरूलाई सरकारले भिजिट भिसामा मान्छे पठाउन लाइसेन्स दिएको होइन, सरकारले यसका विरुद्ध कडा कारबाही गर्छ ।’
-1745656903.jpeg)