काठमाडौं– रोजगारीको सिलसिलामा इजरायलमा रहेका दुई जना नेपालीको मृत्यु भएको छ । मृत्यु भएकामध्ये एक जनाको सवारी दुर्घटनामा र अर्का एक जनाको कोरोनाका कारण मृत्यु भएको हो ।
मृत्यु हुनेमा वैदेशिक रोजगारीको सिलसिलामा इजरायलमा रहेका झापाका रमेशकुमार विश्वकर्मा र सुनसरीका लालबहादुर विष्ट रहेको बताइएको छ । विश्वकर्माको कोरोना र विष्टको सडक दुर्घटनामा मृत्यु भएको इजरायलमा रहेको नेपाली दूतावासले जनाएको छ ।
मृत्यु भएका विश्वकर्माको इजरायलमा नै अन्त्यष्टि गरिएको र बिष्टको शब आइतबार नेपाल पठाइएको दूतावासले जनाएको छ । दूतावासले जनाएअनुसार विश्वकर्माले कोरोनाको खोप नलगाएको बताइएको छ । कोरोना खोप लगाउनेहरूमा मृत्युदर निकै कम हुने विभिन्न अध्ययनहरूले पुष्टि गरेको भन्दै अहिलेसम्म खोप नलगाएर इजरायल तथा साइप्रसमा बस्ने सबै नेपालीलाई खोप लाउनसमेत दूतावासले आग्रह गरेको छ । यस्तै सडक दुर्घटनाका कारण अकालमा ज्यान गुमाउने नेपालीहरूको संख्या निरन्तर बढ्दै गएको भन्दै सडक सुरक्षामा पनि ध्यान दिन दूतावासको आग्रह छ ।
