काठमाडौं– गैरआवासीय नेपाली संघ (एनआरएनए) ले विदेशमा रहेका आफ्ना परिवारका सदस्यलाई जनगणनामा नछुटाउन आग्रह गरेको छ । अहिलेसम्म नेपाल बाहिर कति नेपाली छन् भन्ने आधिकारिक तथ्यांक नभएकाले यस जनगणनाले विदेशमा रहेका नेपालीहरूको आधिकारिक तथ्यांक प्राप्त गर्न ठूलो सहयोग पुग्ने भन्दै विषयमा भएका सदस्यको नाम पनि गणनामा समावेश गर्न संघले आग्रह गरेको हो ।
अहिले नेपालमा १२औँ जनगणना भइरहेको छ । यही २५ कात्तिकदेखि ९ मंसिरसम्म हुने यो गणनामा गणकहरू प्रत्येक घरमा पुगिरहेको बताइएको छ । संघले सुरुदेखि नै विदेशमा रहेका नेपालीहरूको आधिकारिक तथ्यांक संकलन गर्नका लागि नेपाल सरकार समक्ष आग्रहसमेत गर्दै आएको थियो । नेपाल सरकारले यस वर्षदेखि जनगणनामा विदेशमा रहेका नेपालीहरूलाई पनि समेटेको जनाएकाले संघले नेपाल सरकारप्रति हार्दिक आभार व्यक्त गर्दै विदेशमा रहेका सदस्यको विवरण जानकारी दिन आग्रह गरेको हो ।
यस जनगणनाबाट कुन देशमा के कति नेपाली रहेका छन् भन्ने तथ्यांक प्राप्त हुने विश्वास गरिएको छ । यी विवरणहरू सबैले नछुटाई भरेमा अन्दाजमा विदेशमा रहेका नेपालीको तथ्यांक भन्नु नपर्ने संघले जनाएको छ । अहिले विदेशमा करिब ८० लाखभन्दा बढी नेपाली रहेको अनुमान गरिन्छ । यस्तो अनुमान गर्नु पर्ने अवस्थाको पनि यो जनगणनाबाट अन्त्य हुने संघले विश्वास लिएको छ ।
-1745656903.jpeg)